रुकुम पश्चिम। रुकुम पश्चिमको आठबिसकोट नगरपालिकामा म्याराथन हुने भएको छ। नगरपालिकाको वडा नम्बर २ ,४, ५ र ६ मा रहेको चित्रिपाटनलाई चिनाउन म्याराथन हुने भएको हो ।
यहि कार्तिक १८ गते देखि हुने म्याराथनको दुरी ३० किलोमिटर रहने छ । भने, आठबिसकोट नगरपालिका ,वडा नम्बर ४ र ५ संरक्षक रहेको म्याराथन व्यवस्थापन समितिले जनाएको छ।
व्यवस्थापन समितिका अध्यक्ष महेश सी का अनुसार वडा नम्बर ४ को चौतारा देखि सुरु भएर वडा नम्बर ५ को नयाँ डाँडा हुँदै चित्रिपाटन तेस्रा खोला मन्दिरसम्म पुगेर बुराउँसेबाट चौतारा झरेर दौड सकिने छ। उनका अनुसार म्याराथनको विजेताले १ लाख र दोस्रो हुनेले ७५ हजार,तेस्रो हुनेले ५० हजार पुरस्कार पाउने छन्।
त्यस्तै १० औँ स्थानसम्म रहनेलाई ५ हजारको व्यवस्था गरिएको छ । म्याराथन सञ्चालनका लागि नगरपालिका र वडाहरूले पनि बजेटको व्यवस्थापन गरेका छन् भने सहयोगका लागि सार्वजनिक अपिल समेत गरिएको छ । आठबिसकोटको गोतामकोटमा पहिलोपटक साहसिक चित्रिपाटन म्याराथन प्रतियोगिता हुन लागेको हो।
नेपाल सरकारले घोषणा गरेका देशका १ सय पर्यटकीय गन्तव्य मध्येको एक चित्रिपाटनको पर्यटन प्रवर्द्धन गर्ने उद्देश्यले म्याराथन दौड आयोजना गरिएको बताइएको छ । गौतामहरुको उद्गगम स्थल र पर्यटनका लागि प्रचुर सम्भावना रहेकोले चित्रिपाटनको प्रचार प्रसार गरी चिनाउने उद्देश्यले म्याराथन आयोजना गरिएको हो।
