काठमाडौं । वागमती प्रदेशका मुख्यमन्त्री इन्द्रबहादुर बानियाँले एसईई परिक्षामा उत्कृष्ट नतिजा ल्याउने बिधार्थी लाई सम्मान गरेका छन्।
प्याब्सन जिल्ला कार्य समिति ललितपुर द्वारा आयोजित एसईई परिक्षामा उत्कृष्ट नतिजा हासिल गर्ने विद्यार्थीहरुलाई बधाई, सम्मान तथा पुरस्कार वितरण कार्यक्रममा बोल्दै बागमती प्रदेश सरकारका मुख्यमन्त्री एवं नेपाली कांग्रेस बागमती प्रदेश सभापति बानियाँले विद्यार्थीहरुको उपलब्धिले देशको शैक्षिक क्षेत्रलाई थप उत्साहित बनाएको बताए । उनले मेहनत, अनुशासन र गुणस्तरीय शिक्षाले नै विद्यार्थीलाई सफलताको शिखरसम्म पुर्याउने बताएका छन् ।
उनले उत्कृष्ट नतिजा ल्याउने विद्यार्थी, अभिभावक तथा शिक्षकहरुलाई बधाई दिँदै शिक्षा क्षेत्रको गुणस्तर सुधारमा निजी विद्यालयहरुको योगदान महत्वपूर्ण रहेको उल्लेख गरे । कार्यक्रममा सम्मानित विद्यार्थीहरुलाई प्रमाणपत्र तथा पुरस्कार वितरण गरिएको थियो ।
मुख्यमन्त्री बानियाँले आगामी दिनमा पनि विद्यार्थीहरुले अध्ययनमा निरन्तर मेहनत गर्दै राष्ट्र निर्माणमा योगदान पुर्याउने विश्वास व्यक्त गरे । कार्यक्रममा शिक्षा क्षेत्रसँग सम्बन्धित विभिन्न व्यक्तित्व, शिक्षक, अभिभावक तथा विद्यार्थीहरुको उल्लेखनीय सहभागिता रहेको थियो ।
