रुकुम पश्चिमको आठबिसकोट नगरपालिकामा पर्यटन, व्यापार तथा सांस्कृतिक महोत्सव–२०८३ बुधबार देखि सुरु भएको छ । “आठबिसकोट समृद्धिको आधार कला संस्कृति, कृषि, पर्यटन, उद्योग व्यापार हाम्रो मूल आधार” भन्ने नारासहित महोत्सव आयोजना गरिएको आयोजकले जनाएको छ ।
उद्योग वाणिज्य संघ आठबिसकोट रुकुम (पश्चिम) को आयोजनामा हुने महोत्सव जेठ ६ गतेदेखि १७ गतेसम्म सञ्चालन हुनेछ । महोत्सव आठबिसकोट नगरपालिका–९ स्थित रंगशालामा आयोजना गरिएको छ । महोत्सव नगरपालिकाका नगर प्रमुख रवि केसीले उद्घाटन गरेका हुन् । पर्यटन महोत्सव कार्यक्रममा नगर प्रमुखले स्थानीय पर्यटन प्रवर्द्धन, कला–संस्कृतिको संरक्षण र आर्थिक विकासमा महोत्सवको भूमिका महत्वपूर्ण रहेको बताएका छन्।
नगर प्रमुख केसीले भने, “रुकुम पश्चिम प्राकृतिक सौन्दर्य, धार्मिक तथा सांस्कृतिक सम्पदाले भरिपूर्ण नगरपालिका हो । यस्ता पर्यटन महोत्सवले स्थानीय कला, संस्कृति र उत्पादनलाई राष्ट्रियस्तरमा चिनाउन मद्दत पुर्याउँछ । पर्यटन क्षेत्रको विकाससँगै युवाहरूलाई रोजगारी तथा व्यवसायका अवसर सिर्जना हुने विश्वास लिएका छौँ ।”
महोत्सव मार्फत रुकुम पश्चिमका लोपोन्मुख कला, संस्कृति, भेषभूषा तथा बाजागाजाको संरक्षण र प्रवर्द्धन गर्ने लक्ष्य राखिएको छ । साथै स्थानीय उत्पादनको बजारीकरण, व्यापार व्यवसाय प्रवर्द्धन, पर्यटन विकास तथा सांस्कृतिक पहिचान जगेर्ना गर्ने उद्देश्य पनि रहेको जनाइएको छ । नगरपालिकाले पर्यटन पूर्वाधार निर्माण, सडक पहुँच विस्तार, होमस्टे प्रवर्द्धन तथा पर्यटकीय क्षेत्रको प्रचारप्रसारलाई प्राथमिकतामा राखेर काम गरिरहेको पनि उल्लेख गरे । साथै, आन्तरिक तथा बाह्य पर्यटकलाई सुरक्षित र आकर्षक वातावरण प्रदान गर्न सबै सरोकारवालाको सहकार्य आवश्यक रहेको धारणा व्यक्त गरे ।
महोत्सवमा राष्ट्रिय तथा स्थानीय कलाकारहरूको प्रस्तुति रहनेछ । कार्यक्रममा राजेश हमाल, बद्री पंगेनी, प्रकाश सपुत, समिक्षा अधिकारी , सम्झना भण्डारी, शान्तिश्री परियार लगायतका दर्जनौ कलाकार सहभागी हुने प्रचार सामग्रीमा उल्लेख गरिएको छ ।
त्यस्तै उद्घाटन समारोहमा मयुर नाच, सिंगार नाच तथा पञ्चेबाजा नाच प्रदर्शन गरिने आयोजकले जनाएको छ । महोत्सव अवधिभर कृषि, व्यापार, पर्यटन तथा स्थानीय कला संस्कृतिसँग सम्बन्धित विभिन्न स्टल समेत राखिनेछन् ।
