रुकुम पश्चिमको आठबिसकोट ९ स्थित स्थानीय पेदिखोलामा खोलामा नयाँ ट्रसको पुल निर्माण भएपछि आवतजावतमा सहजता आएको भन्दै ज्येष्ठ नागरिकहरुले नगर प्रमुख रवि केसी लाई धन्यवाद व्यक्त गरेका छन् । वर्षौंदेखि जोखिम मोलेर खोला तर्न बाध्य स्थानीयवासी पुल बनेपछि खुसी भएका हुन् ।
पुल उद्घाटन कार्यक्रममा बोल्दै ज्येष्ठ नागरिक देउदत्त बिष्टले भावुक हुँदै भने, “पहिला खोलो तर्दा धेरै दुःख पायौं, अहिले पुल बनेपछि हाम्रो जीवन सजिलो भयो । धन्यवाद बाबु, हामी जस्ता ज्येष्ठ नागरिकको पीडा बुझेर यो काम गरिदिनुभयो ।”
त्यस्तै अर्का जेष्ठ नागरिक सर्जन बिष्टले भने ,“हामी बूढाबूढीलाई खोलो तर्न निकै डर लाग्थ्यो । कतिपटक लडिने हो कि भन्ने चिन्ता हुन्थ्यो । अहिले पुल बनेपछि ढुक्क भएर हिँड्न पाएका छौं । हाम्रो दुःख बुझेर पुल बनाइदिनुभएकोमा मेयर साबलाई धेरै आशीर्वाद र धन्यवाद ।”
स्थानीयवासीका अनुसार वर्षायाममा खोला बढ्दा विद्यालय जाने विद्यार्थी, बिरामी तथा ज्येष्ठ नागरिकलाई विशेष समस्या हुने गरेको थियो । पुल निर्माणसँगै अब दैनिक जीवन सहज भएको उनीहरुको भनाइ छ ।
नगर प्रमुखले विकास निर्माणलाई प्राथमिकतामा राख्दै नागरिकको आवश्यकता अनुसार काम भइरहेको बताउनुभयो । उहाँले आगामी दिनमा पनि जनताको सहज जीवनका लागि पूर्वाधार विकासलाई निरन्तरता दिने प्रतिबद्धता व्यक्त गरे ।
