रुकुम पश्चिम । जिल्ला प्रहरी कार्यालय रुकुम (पश्चिम भाग) ले लुटपाट घटनामा संलग्न रहेको आरोपमा एक जनालाई पक्राउ गरेको छ। पक्राउ पर्नेमा आठबिसकोट नगरपालिका–१ निवासी अन्दाजी २५ वर्षीय चालक मुकेश बिक रहेका छन्।
प्रहरीका अनुसार २०८३ जेठ ५ गते राति करिब ७ :३० बजे आठबिसकोट नगरपालिका–९ राडीबजार क्षेत्रबाट १ नम्बर वडाको खेततर्फ जाँदै गरेको बा २३ च २९५७ नम्बरको डबल क्याप बोलेरो गाडीका चालक मुकेश बिकमाथि ४/५ जनाको समूहले कुटपिट गरी दुई थान मोबाइल र नगद भएको झोला लुटेर फरार भएको सूचना प्राप्त भएको थियो।
घटनापछि प्रहरीले चालकलाई नियन्त्रणमा लिएर अनुसन्धान गर्दा घटनामा चालक स्वयंको संलग्नता रहेको खुलेको जनाएको छ। अनुसन्धानका क्रममा आठबिसकोटका नगरप्रहरी सहायक निरीक्षक खडक बुढाथोकी मार्फत चालकलाई रु. ११ लाख ३५ हजार रकम घरमा श्रीमती लाई दिनु भनी जिम्मा लगाइएको खुलेको प्रहरीले जनाएको छ।
प्रहरीका अनुसार चालक बिकले यात्रुहरू नास्ता खान ओर्लिएको समयमा आफूसँग रहेको रकम लुटिएको नाटक गर्न आफ्नै साथीहरूसँग योजना बनाएका थिए। योजना अनुसार गाडी जंगल क्षेत्रमा रोकी मुखुण्डो लगाएका चार जना व्यक्तिले गाडीभित्र प्रवेश गरी नगद भएको झोला लिएर फरार भएको नाटक गरिएको प्रहरीको भनाइ छ।
लुटिएको भनिएको उक्त रकम मध्ये ११ लाख ३० हजार रुपैयाँ घटनास्थल नजिकैको जंगलबाट बरामद गरिएको प्रहरीले जनाएको छ। घटनामा संलग्न अन्य फरार व्यक्तिहरूको खोजी भइरहेको तथा पक्राउ परेका चालक मुकेश बिकमाथि थप अनुसन्धान भइरहेको जिल्ला प्रहरी कार्यालय रुकुम (पश्चिम भाग) ले जनाएको छ।
