रुकुम पश्चिमको आठबिसकोट नगरपालिकाले आज शुक्रवार बजार अनुगमन गरेको छ । अखाद्य बस्तुहरु बिक्री वितरण हुन नदिन, शुद्धतामा ध्यान दिन तथा बजार मूल्यमा एकरुपता कायम गर्नका लागि आठबिसकोट ७ र ८ वडामा रहेका किराना पसलहरुको अनुगमन गरिएको हो ।
नगर उपप्रमुख धन कुमारी शाहीले बजारलाई सुब्यवस्थित बनाउनुका साथै उपभोक्ताहरुलाई गुणस्तरीय बस्तु उपलब्ध गराउनका लागि नगरपालिकाले नियमित बजार अनुगमन गर्ने कार्य अन्तर्गत अनुगमन गरिएको बताइन ।
गर्मी मौसम शुरु भएसँगै अनेक खालका रोगहरु लाग्न सक्ने भएकाले अखाद्य बस्तुहरुको बिक्री वितरण रोक्दै स्वच्छ र सफा खानेकुराको प्रयोग गर्न गराउन, मूल्य सूचि राख्न तथा नगरपालिकामा पसल दर्ता गर्नका लागि ब्यवसायीहरुलाई सचेत गराईएको उपप्रमुख शाहीले बताईन्।
अनुगमनमा ६ वटा पसलबाट २३ हजार रुपैयाँ जरिवाना र २० हजार रुपैयाँ बराबरको म्याद गुज्रीएका खाद्य तथा अखाद्य वस्तु जफत गरी नष्ट गरिएको प्रशासन सहायक उद्योग शाखा प्रमुख त्रीपुरा चन्दले जानकारी दिईन्। 
विवेक स्टेशनरी तथा किराना पसलमा अबैध मदिरा बिक्रि गरे बापत १० हजार , प्रबिरलाल सिंहले व्यवसाय दर्ता नगरी चलाएको मेडिकल बाट ५ हजार, रविन्द्र काल्चे २ हजार, बिजय आग्री २ हजार, लक्ष्मी बुढा २ लगायत कमला किराना पसल , रमिता किराना तथा खुद्रा पसल बाट म्याद गुज्रीएका मालसमान जफत गरिएको हो । व्यवसाय दर्ता नभएका र अबैध मदिरा बिक्रिबितरण गरिरहेका पसलहरुबाट २३ हजार रुपैयाँ जरिवाना गरिएको हो । यस अघि उनीहरुलाई पटक पटक व्यवसाय दर्ता / नविकरण तथा मापदण्ड भित्र रहेर सञ्चालन गर्न आग्रह गरिएको थियो । तर अटेरी गर्दै आएपछि नियम अनुसार म्याद गुज्रीएका सामग्री जफत र नगत जरिवान गरिएको हो । कार्यालयका कर्मचारी, नगर उपप्रमुख नगर प्रहरी, पत्रकार लगायतको उपस्थितिमा अनुगमन गरिएको हो ।
