इन्डोनेसियाको पूर्वी क्षेत्रमा शनिबार बिहान ७.७ म्याग्निच्युडको शक्तिशाली भूकम्प गएको छ। फ्लोरेस द्वीपको उत्तरी तटभन्दा बाहिर गएको भूकम्पमा परी कम्तीमा दुई जनाको मृत्यु भएको अन्तर्राष्ट्रिय सञ्चारमाध्यमले जनाएका छन्।
अमेरिकी भूगर्भ सर्वेक्षण (USGS) का अनुसार स्थानीय समयअनुसार बिहान करिब ५ः५८ बजे भूकम्प गएको हो। भूकम्पको केन्द्रबिन्दु पूर्वी नुसा तेंगारा प्रान्तको एन्डे शहरबाट करिब ६८ किलोमिटर उत्तर–उत्तरपश्चिममा र करिब १० किलोमिटर गहिराइमा रहेको थियो।
भूकम्पपछि भवन तथा घरहरूमा क्षति पुगेको छ भने केही स्थानमा संरचना भत्किएका छन्। अस्पतालका बिरामीलाई समेत सुरक्षित स्थानमा सारिएको र प्रभावित क्षेत्रमा उद्धार तथा क्षतिको मूल्याङ्कन भइरहेको जनाइएको छ। भूकम्पपछि ६.१ म्याग्निच्युडसहितका परकम्पहरू समेत महसुस भएका छन्।
समुद्रमुनि भूकम्प गएपछि इन्डोनेसियाली अधिकारीहरूले सुनामीको चेतावनी जारी गर्दै तटीय क्षेत्रका बासिन्दालाई समुद्रबाट टाढा र अग्लो स्थानमा जान आग्रह गरेका थिए। केही क्षेत्रमा एक मिटरभन्दा कम उचाइका सुनामी छाल रेकर्ड भए पनि पछि सुनामी चेतावनी हटाइएको छ।
भूकम्पपछि फ्लोरेसका विभिन्न क्षेत्रमा हजारौँ मानिस सुरक्षित स्थानतर्फ लागेका थिए। इन्डोनेसिया प्रशान्त महासागरको ‘रिङ अफ फायर’ क्षेत्रमा पर्ने भएकाले यहाँ पटक–पटक शक्तिशाली भूकम्प तथा ज्वालामुखी गतिविधि हुने गर्छ।
अधिकारीहरूले प्रभावित क्षेत्रमा उद्धार तथा राहत कार्यलाई तीव्रता दिएका छन् भने थप क्षति र मानवीय हताहतीबारे विवरण संकलन भइरहेको छ।
