अछाममा बोलेरो दुर्घना हुँदा दुईजनाको मृत्यु भएको छ । तीन जना घाइते भएका छन् । मध्यपहाडी लोकमार्ग अन्तर्गत पञ्चदेवल बिनायक नगरपालिका–४ मा भएको सडक दुर्घनामा परेर दुईजनाको मृत्यु भएको हो भने तीन जना घाइते भएका हुन्।
कर्णाली नदी किनारमा रहेको बेलखेत नजिकै बागमती प्रदेश ०१–०२७ च २२७७ नम्बरको बोलेरो शुक्रबार साँझ सडक घुम्तीबाट दुईसय मिटर तल खस्दा त्यसमा सवार सबै पाँचजना घाइते भएका थिए ।
उनीहरु मध्य मकवानपुर जिल्लाको हेटौँडा उपमहानगरपालिका बस्ने वर्ष ४९ का नविन तुलाधर र बर्दिया जिल्लाको बाँसगढी नगरपालिका–५ का ४५ वर्षीय रामप्रकाश थारुको उपचारका क्रममा मृत्यु भएको हो ।
राकममा प्राथमिक उपचारपछि थप उपचारकालागि सुर्खेत लगिएका उनीहरुको राती प्रदेश अस्पताल सुर्खेतमा मृत्यु भएको जिल्ला प्रहरी कार्यालय अछामका प्रमुख प्रहरी नायव उपरीक्षक ओमप्रकाश खनालले बताए ।
उनका अनुसार गाडी चालक बाँकेको नेपालगंजका राम राजेन्द्र भिमराज चट्टान गुप्ता र सिराहका सन्त कुमार साहको अवस्था पनि चिन्ताजनक छ । अर्का घाइते स्यांजाका अर्जुन कुमार पौडेलको अवस्था भने सामान्य छ । उनीहरु तीनैजनाको प्रदेश अस्पताल सुर्खेतमा उपचार भइरहेको डीएसपी खनालले बताए ।
उनका अनुसार दार्चुलाबाट जुम्ला जाँदै गर्दा जनकपुर स्थित सत्लोक आश्रमको गाडी दुर्घटनामा परेको हो । प्रहरीको प्रारम्भीक अनुसन्धान अनुसार चालक निदाएका कारण दुर्घना भएको हुनसक्ने देखिएको छ ।
