पोखरा ।*विश्वकर्मा समाज नेपाल केन्द्रीय कार्यालय कास्कीको आयोजनामा सञ्चालित ९औँ विश्वकर्मा भलिबल कप–२०८३*शनिबार पोखरा रंगशालामा सम्पन्न भएको छ। असोज १ गतेदेखि सुरु भएको प्रतियोगिताको फाइनल खेलसँगै सम्पन्न प्रतियोगितामा दाजुभाइ क्लब गल्याङ प्रथम, हरिनास गाउँपालिका दोस्रो र शुक्लागण्डकी–१२ तेस्रो** भएका छन्।
प्रतियोगितामा प्रथम भएको दाजुभाइ क्लब गल्याङले १ लाख रुपैयाँ नगदसहित ट्रफी, मेडल तथा प्रमाणपत्र** प्राप्त गरेको छ। दोस्रो भएको हरिनास गाउँपालिकाले **५० हजार रुपैयाँ नगद, ट्रफी, मेडल तथा प्रमाणपत्र** र तेस्रो भएको शुक्लागण्डकी–१२ ले **२५ हजार रुपैयाँ नगद, ट्रफी, मेडल तथा प्रमाणपत्र** प्राप्त गरेका छन्।
प्रतियोगितामा व्यक्तिगत विधातर्फ पनि उत्कृष्ट प्रदर्शन गर्ने खेलाडी तथा प्रशिक्षकलाई सम्मान गरिएको छ। **बेस्ट स्पाइकर** हरिनास गाउँपालिका–६ का **सुनील मानन्धर**, **बेस्ट ब्लकर** हरिनास गाउँपालिकाकै **सञ्जित मानन्धर**, **बेस्ट डिफेन्डर** दाजुभाइ क्लब गल्याङका **सुशील विश्वकर्मा** र **बेस्ट सर्भर** शुक्लागण्डकी–१२ का **विशाल ठाकुरी** घोषित भएका छन्।
त्यस्तै **बेस्ट कोच**दाजुभाइ क्लब गल्याङका **श्याम विश्वकर्मा** र प्रतियोगिताकै **उत्कृष्ट खेलाडी** दाजुभाइ क्लब गल्याङका **उमेश सेन्चुरी घोषित भएका छन्। व्यक्तिगत विधातर्फ उत्कृष्ट घोषित सबैलाई जनही २ हजार रुपैयाँ नगद पुरस्कार** प्रदान गरिएको आयोजकले जनाएको छ।
प्रतियोगिताको समापन समारोहमा बोल्दै पोखरा उद्योग वाणिज्य संघकी अध्यक्ष **शोभा गौतमले विश्वकर्मा समाज केवल एउटा समुदायको नाम नभई श्रम र सीपबाट सिर्जित पहिचान भएको** बताउनुभयो। समाज निर्माणमा महत्वपूर्ण योगदान दिने सीपयुक्त हातहरूको सम्मान गर्नु भनेको श्रम र सीपकै सम्मान गर्नु भएको उहाँको भनाइ थियो।
गौतमले भलिबल प्रतियोगिता केवल जित र हारको प्रतिस्पर्धा मात्र नभई युवाहरूलाई जोड्ने माध्यम, प्रतिभा उजागर गर्ने अवसर तथा अनुशासन र सहकार्य सिकाउने विद्यालयका रूपमा रहेको बताउनुभयो। खेलकुदले नयाँ पुस्तालाई समुदाय, संस्कृति र सामाजिक गतिविधिसँग जोड्नुका साथै विश्वकर्मा समाजको कला, संस्कृति, सीप र पहिचानलाई नयाँ पुस्तामाझ पुर्याउन महत्वपूर्ण भूमिका खेल्ने उहाँले बताउनुभयो।
“खेलमा एउटा टोलीले जित्छ र अर्कोले हार्छ। तर वास्तवमा मैदानमा सहभागी हुने सबैले केही न केही जितेर फर्कन्छन्। उनीहरूले अनुभव, मित्रता, आत्मविश्वास, माया र नयाँ ऊर्जा लिएर फर्कन्छन्,” गौतमले भन्नुभयो।
पोखरा उद्योग वाणिज्य संघ निजी क्षेत्रको प्रतिनिधिमूलक संस्था भए पनि व्यवसायी र उद्योगीका विषयमा मात्र सीमित नभई **समाज, युवा, संस्कृति, पर्यटन, रोजगारी तथा समग्र पोखराको समृद्धिलाई समेत आफ्नो जिम्मेवारीका रूपमा लिँदै आएको** उहाँले बताउनुभयो।
“समुदाय बलियो भयो भने समाज बलियो हुन्छ र समाज बलियो भयो भने समग्र अर्थतन्त्र पनि बलियो हुन्छ,” गौतमले भन्नुभयो।
विश्वकर्मा समाज नेपाल केन्द्रीय कार्यालय कास्कीले प्रतियोगितालाई निरन्तरता दिँदै आएकोमा धन्यवाद व्यक्त गर्दै उहाँले आगामी दिनमा प्रतियोगितालाई अझ व्यवस्थित, व्यापक र राष्ट्रिय तथा अन्तर्राष्ट्रियस्तरसम्म पहिचान बनाउने गरी अगाडि बढाउन शुभकामना दिनुभयो।
सम्पूर्ण खेलाडीलाई उत्कृष्ट प्रदर्शन र अनुशासन कायम राखेकोमा बधाई दिँदै गौतमले जितभन्दा ठूलो कुरा खेलको भावना बुझ्नु रहेको र खेलमा सहभागी हुनु नै खेलाडीको जीत भएको बताउनुभयो। विश्वकर्मा समाजको कला, संस्कृति, सीप र पहिचानको संरक्षणसँगै खेलकुदमार्फत नयाँ पुस्तालाई जोड्ने अभियानलाई थप उचाइमा पुर्याउनुपर्नेमा उहाँले जोड दिनुभयो।
यस्ता सामाजिक तथा सांस्कृतिक गतिविधिलाई प्रोत्साहन गर्न पोखरा उद्योग वाणिज्य संघ खेलाडी तथा आयोजकको साथमा रहने उहाँले प्रतिबद्धता व्यक्त गर्नुभयो।
#
प्रतियोगिता आयोजक समितिका अध्यक्ष बेलबहादुर विश्वकर्माले ९औँ संस्करणको प्रतियोगिता आयोजना गर्नु चुनौतीपूर्ण रहे पनि प्रतियोगितालाई भव्य र व्यवस्थित बनाउन समाजका सबै तहबाट निरन्तर प्रयास गरिएको बताउनुभयो।
युवा खेलाडीलाई प्रोत्साहन गर्ने उद्देश्यले प्रतियोगिता आयोजना गरिएको उल्लेख गर्दै उहाँले आगामी दिनमा पनि यस्ता कार्यक्रमलाई अझ व्यवस्थित र उत्कृष्ट बनाउँदै लैजाने प्रतिबद्धता व्यक्त गर्नुभयो।
प्रतियोगिता सफल बनाउन विभिन्न क्षेत्रबाट सहयोग प्राप्त भएको उल्लेख गर्दै उहाँले आयोजक, खेलाडी, प्रायोजक, दाता, संघ–संस्था तथा सम्पूर्ण सहयोगीप्रति आभार व्यक्त गर्नुभयो।
प्रतियोगिताका खेलकुद संयोजक पीताम्बर सुनारले* प्रतियोगितामा सहभागी सम्पूर्ण खेलाडी तथा टोली, प्रायोजक, दाता, संघ–संस्था र प्रतियोगिता सफल बनाउन महत्वपूर्ण भूमिका निर्वाह गर्ने सम्पूर्ण महानुभावप्रति धन्यवाद व्यक्त गर्नुभयो।
उहाँले आगामी दिनमा पनि यस्ता प्रतियोगिता आयोजना गर्दै युवा तथा उदीयमान प्रतिभावान खेलाडीको पहिचान र विकासमा समाज अग्रसर रहने बताउनुभयो। खेलकुदका माध्यमबाट युवालाई सकारात्मक गतिविधिमा जोड्नुका साथै प्रतिभावान खेलाडीलाई आफ्नो क्षमता प्रदर्शन गर्ने अवसर प्रदान गर्ने उद्देश्यलाई निरन्तरता दिइने उहाँको भनाइ थियो।
कार्यक्रमको सञ्चालन विश्वकर्मा समाज नेपालका सचिव तथा प्रवक्ता शरणसिंह विश्वकर्माले गर्नुभएको थियो।
विश्वकर्मा समाज नेपाल केन्द्रीय कार्यालय कास्कीले आयोजना गर्दै आएको यस प्रतियोगिताले समुदायका युवालाई खेलकुदसँग जोड्नुका साथै आपसी भाइचारा, सहकार्य, अनुशासन र सामाजिक एकतालाई बलियो बनाउने उद्देश्य लिएको आयोजकले जनाएको छ। खेलकुदसँगै विश्वकर्मा समुदायको कला, संस्कृति, सीप र पहिचानको संरक्षण तथा नयाँ पुस्तामाझ हस्तान्तरण गर्ने अभियानका रूपमा समेत प्रतियोगितालाई निरन्तरता दिइँदै आएको आयोजकको भनाइ छ।
