तिमी केवल जन्म दिने शरीर होइनौ आमा
तिमी त अस्तित्वको आदिम स्पन्दन हौ।
मेरो सासमा बग्ने अदृश्य प्राणशक्ति
मेरो अन्धकारमा टल्किने एक मात्र दीपशिखा हौ तिमी।
तिम्रो ममता कुनै साधारण भावना होइन
यो त अनन्त आकाश जस्तै विशाल र गगनचुम्बी छ
जहाँ म थाकेर ढल्दा पनि
तिमीले मलाई फेरि उठाउने शक्ति दिन्छ्यौ।
तिम्रा आँखाले
पीडाको वर्षात बोकेको बेलापनि
ओठमा सधैं मुस्कानको दियो बाल्न
कसरी सक्छौ आमा?
अनि आफ्ना पीडा र चोटहरू लुकाएर
मलाई सपनाको संसार दिने
अद्भुत कला कस्ले सिकायो ?
आमा
तिमी त त्यागको साक्षात् मूर्ति हौ
जहाँ आफ्ना इच्छा हराएर
मेरो भविष्यको जग बसालिदिन्छौ
मेरो प्रत्येक सफलता
तिम्रो निस्वार्थ तपस्याको परिणाम हुन्
र मेरो प्रत्येक असफलता
तिम्रो काखमा पग्लिने एउटा आँसु हो।
यदि शब्दहरूमा तिमीलाई व्याख्या गर्न खोजेँ भने
शब्दहरू साना हुन्छन्
किनकि तिमी त
भावनाको त्यो अथाह सागर हौ
जसलाई नाप्ने कुनै सीमा छैन।
आमा
तिमी बिना मेरो अस्तित्व अधुरो छ
तिमी नै मेरो प्रारम्भ हौ
र अन्तिम आश्रय हौ।
मातातिर्थ औंसीको सम्पुर्ण आमाहरुलाई हार्दिक शुभकामना!
अमृत कुमार बोहोरा (आशिर्वाद)
