रुकुम पश्चिमको आठबिसकोट नगरपालिकामा पर्यटन, व्यापार तथा सांस्कृतिक महोत्सव–२०८३ आयोजना हुने भएको छ । “आठबिसकोट समृद्धिको आधार कला संस्कृति, कृषि, पर्यटन, उद्योग व्यापार हाम्रो मूल आधार” भन्ने नारासहित महोत्सव आयोजना गर्न लागिएको आयोजकले जनाएको छ ।
उद्योग वाणिज्य संघ आठबिसकोट रुकुम (पश्चिम) को आयोजनामा हुने महोत्सव जेठ २ गतेदेखि १२ गतेसम्म सञ्चालन हुनेछ । महोत्सव आठबिसकोट नगरपालिका–९ स्थित रंगशालामा आयोजना गरिने बताइएको छ ।
महोत्सव मार्फत रुकुम पश्चिमका लोपोन्मुख कला, संस्कृति, भेषभूषा तथा बाजागाजाको संरक्षण र प्रवर्द्धन गर्ने लक्ष्य राखिएको छ । साथै स्थानीय उत्पादनको बजारीकरण, व्यापार व्यवसाय प्रवर्द्धन, पर्यटन विकास तथा सांस्कृतिक पहिचान जगेर्ना गर्ने उद्देश्य पनि रहेको जनाइएको छ ।
महोत्सवमा राष्ट्रिय तथा स्थानीय कलाकारहरूको प्रस्तुति रहनेछ । कार्यक्रममा राजेश हमाल, बद्री पंगेनी, प्रकाश सपुत, समिक्षा अधिकारी , सम्झना भण्डारी, शान्तिश्री परियार लगायतका दर्जनौ कलाकार सहभागी हुने प्रचार सामग्रीमा उल्लेख गरिएको छ ।
त्यस्तै उद्घाटन समारोहमा मयुर नाच, सिंगार नाच तथा पञ्चेबाजा नाच प्रदर्शन गरिने आयोजकले जनाएको छ । महोत्सव अवधिभर कृषि, व्यापार, पर्यटन तथा स्थानीय कला संस्कृतिसँग सम्बन्धित विभिन्न स्टल समेत राखिनेछन् ।
