रुकुम पश्चिको आठबिसकोट नगर अस्पतालमा कार्यरत ३६ जना करार कर्मचारीले सामूहिक रूपमा राजीनामा दिएका छन्। अस्पतालमा कार्यरत कर्मचारीहरूले विभिन्न माग तथा सेवा–सुविधा सम्बन्धी विषयलाई लिएर सामूहिक राजीनामा बुझाएको जनाइएको छ।
कर्मचारीहरूले अस्पताल प्रशासन तथा आठबिसकोट नगरपालिकाका प्रमुख प्रशासकीय अधिकृत समक्ष राजीनामा पत्र बुझाएका हुन्। सामूहिक राजीनामापछि अस्पतालको दैनिक सेवा प्रवाह प्रभावित हुन सक्ने देखिएको छ। उनीहरुले नगरपालिकामा कार्यरत कर्मचारी र स्वास्थ्यमा कार्यरत कर्मचारी बीच विभेद गरिएको भन्दै यस अघि पनि समान माग गरेका थिए।
अस्पताल स्रोतका अनुसार कर्मचारीहरूको राजीनामाको कारणबारे थप छलफल र समाधानको प्रयास भइरहेको छ। यद्यपि, कर्मचारी पक्षले आफ्नो माग सम्बोधन नभएसम्म निर्णयमा अडिग रहने संकेत गरेको बताइएको छ।
यस घटनाले स्थानीय स्वास्थ्य सेवामा असर पर्न सक्ने भएकाले सरोकारवाला निकायको ध्यानाकर्षण भएको छ। नगर अस्पताल व्यवस्थापन, नगरपालिकाका प्रतिनिधि तथा कर्मचारीबीच समस्या समाधानका लागि संवाद जारी रहेको बताइएको छ।
