काठमाडौँ । बागमती प्रदेश सरकारका मुख्यमन्त्री इन्द्रबहादुर बानियाँले स्थानीय तहको समृद्धि र सुशासनलाई प्राथमिकतामा राखेर बागमती प्रदेश सरकारले विकासका कार्यक्रम अघि बढाइरहेको बताएका छन्।
किर्तिपुर नगरपालिका द्वारा आयोजित किर्तिपुर नगरपालिकाको नवौं नगर अधिवेशन कार्यक्रमलाई सम्बोधन गर्दै कार्यक्रमका प्रमुख अतिथि तथा बागमती प्रदेश सरकारका मुख्यमन्त्री एवं नेपाली कांग्रेस बागमती प्रदेश सभापति बानियाँले स्थानीय सरकार र प्रदेश सरकारबीचको सहकार्यलाई अझ प्रभावकारी बनाउँदै जनअपेक्षा अनुरूपका विकास निर्माणका कामलाई तीव्रता दिइने बताए।
मुख्यमन्त्री बानियाँले किर्तिपुरको ऐतिहासिक, सांस्कृतिक तथा शैक्षिक महत्वलाई उल्लेख गर्दै नगरको दिगो विकासका लागि आवश्यक पूर्वाधार निर्माण, शिक्षा, स्वास्थ्य तथा पर्यटन प्रवर्द्धनका क्षेत्रमा प्रदेश सरकारले विशेष ध्यान दिएको बताए। उनले जनप्रतिनिधिहरूलाई पारदर्शिता, जवाफदेहिता र जनमुखी सेवा प्रवाहलाई प्राथमिकता दिन आग्रह गरे।
नगर अधिवेशनले आगामी विकास योजना, नीति तथा कार्यक्रमबारे व्यापक छलफल गर्दै नगरको समग्र विकासका लागि आवश्यक रणनीति तय गर्ने विश्वास व्यक्त गरिएको थियो। कार्यक्रममा जनप्रतिनिधि, राजनीतिक दलका नेता, कर्मचारी तथा स्थानीयवासीहरूको उल्लेख्य सहभागिता रहेको थियो।
