आठबिसकोट। रुकुम पश्चिमको आठबिसकोट नगरपालिकाअन्तर्गत कार्यरत स्वास्थ्यकर्मीहरूले लामो समयदेखि सेवासुविधा र प्रोत्साहन भत्तासम्बन्धी माग पूरा नभएको भन्दै सम्बन्धित वडा र नगरपालिकालाई मागपत्र सार्वजनिक गरेका छन्।
स्वास्थ्यकर्मीहरूले नगरपालिकाका विभिन्न स्वास्थ्य संस्थामा कार्यरत करार कर्मचारीहरूले संघीय तथा प्रदेश सरकारले निर्धारण गरेका सेवा–सुविधा र प्रोत्साहन भत्ताबाट वञ्चित हुनुपरेको गुनासो गरेका छन्। उनीहरूले अन्य स्थानीय तहका कर्मचारीको तुलनामा आफूहरूलाई विभेद गरिएको आरोप समेत लगाएका छन्।
ज्ञापनपत्रमा भनिएको छ, यसअघि पालिका र वडा सँग भएका छलफल तथा बैठकबाट माग सम्बोधन गर्ने प्रतिबद्धता जनाइए पनि हालसम्म कार्यान्वयन नभएको उल्लेख गरिएको छ। माग पूरा नभए चरणबद्ध आन्दोलनका कार्यक्रम अघि बढाउने चेतावनी पनि स्वास्थ्यकर्मीहरूले दिएका छन्।
स्वास्थ्यकर्मीहरूले पाचौँ तहको कर्मचारीको तलब २९ हजार र चौथो तहको २३ हजार हुँदा उता नगरपालिकामा कार्यरत अन्य कर्मचारीको तलब भने पाचौं तहको ३४ हजार र चौथो तहको ३२ हजार सहित महँगी भत्ता र स्थानीय भत्ता समावेश गरिएको एक कर्मचारीले उज्यालोपाटी लाई बताए।
यस विषयमा अन्य वडाहरुमा बुझ्दा सम्पर्क हुन सकेन भने वडा नम्वर ९ का वडा अध्यक्ष जनक बहादुर बटाला लाई सम्पर्क गर्दा आफुलाई थाहा नभएको र वडामा कुनैपनि माग पत्र नआएको बताए। यसअघि करारका स्वास्थ्य कर्मचारीहरुले तलबको बिषयमा गुनासो गरेपनि सुनुवाई हुन नसकेको बटालाले जानकारी दिए।
