रोल्पामा आज भएको जिप दुर्घटनामा मृत्यु हुनेको संख्या २० पुगेको छ। प्रहरीका अनुसार घटनास्थलमा उद्धार कार्य अझै जारी रहेको छ।

जिल्ला प्रहरी कार्यालय रोल्पाका अनुसार दुर्घटनामा २० जनाको ज्यान गएको पुष्टि भएको छ । दुर्घटनामा एक जना यात्रु भने हाम फालेर ज्यान जोगाउन सफल भएको जनाइएको छ।

रोल्पाको थवाङ गाउँपालिका-१ जलजलास्थित क्षेत्रमा रुकुम पूर्वबाट जाँदै गरेको लु १ ज ४१६७ नम्बरको जिप दुर्घटनामा परेको हो। जिप सडकबाट करिब ८०० मिटर तल खसेको बताइएको छ।

घटनास्थलमा वर्षा भइरहेकाले उद्धार तथा खोजी कार्यमा कठिनाइ भइरहेको प्रहरीले जनाएको छ। दुर्घटनाको कारण र अन्य विवरण संकलन भइरहेको छ। मृतकको पहिचान खुलेको छैन।