काठमाडौँ । वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको आक्रमण र तोडफोडका दोषीलाई कानुनी कारबाहीको माग गर्दै नेपाल चिकित्सक संघले आह्वान गरेको आन्दोलनका कारण दोस्रो दिन बुधबार पनि देशभरका स्वास्थ्य सेवा प्रभावित भएका छन्। संघको आह्वानमा काठमाडौँ उपत्यकालगायत देशभरका सरकारी तथा निजी अस्पतालहरूमा आकस्मिकबाहेकका सबै स्वास्थ्य सेवा बन्द गरिएका हुन्।
दोषीलाई कानुनी दायरामा ल्याउन र स्वास्थ्यकर्मीको सुरक्षा सुनिश्चित गर्न सरकार उदासीन बनेको आरोप लगाउँदै संघले आन्दोलनलाई निरन्तरता दिएको जनाएको छ। आन्दोलनका कारण देशभरका अस्पतालहरूमा बहिरंग (ओपीडी) सेवा, नियमित स्वास्थ्य परीक्षण, पूर्वनिर्धारित शल्यक्रिया तथा अन्य गैरआकस्मिक सेवाहरू पूर्णरूपमा ठप्प बनेका छन्।
यद्यपि बिरामीको संवेदनशीलतालाई ध्यानमा राख्दै आकस्मिक सेवा भने नियमित रूपमा सञ्चालन भइरहेको छ। नियमित ओपीडी सेवा अवरुद्ध भएपछि काठमाडौँका त्रिवि शिक्षण अस्पताल र वीर अस्पतालसहितका प्रमुख सरकारी अस्पतालहरूमा बिरामीको चाप बढेको छ। देशका विभिन्न भागबाट उपचारका लागि आएका सर्वसाधारण बिरामी सेवा नपाएर अलपत्र पर्दै रित्तो हात फर्किन बाध्य भएका छन् भने केहीले आकस्मिक कक्षमा पालो पर्खिनुपरेको छ।
नेपाल चिकित्सक संघले दोषीमाथि तत्काल कारबाही गरी स्वास्थ्यकर्मीको सुरक्षा सुनिश्चित नगरिए आन्दोलनका कार्यक्रम अझ सशक्त बनाइने चेतावनी दिएको छ। यता, स्वास्थ्यजस्तो संवेदनशील सेवा ठप्प हुँदा सर्वसाधारणले ठूलो सास्ती खेप्नुपरेको भन्दै बिरामीका आफन्त र नागरिक समाजले चिकित्सकका जायज माग सम्बोधन गरी स्वास्थ्य सेवा अविलम्ब सहज बनाउन सरकारसँग जोडदार माग गरेका छन्।
