रुकुम पश्चिम । गत फागुन २१ गते सम्पन्न प्रतिनिधि सभा निर्वाचनपछि नेपाली काँग्रेस रुकुम पश्चिमका एक युवा नेताले सक्रिय राजनीतिबाट पछि हट्ने घोषणा गरेका छन्।
नेपाली काँग्रेस रुकुम पश्चिमको प्रवक्ता एवं चुनाव प्रचारप्रसार समितिको संयोजकको जिम्मेवारी सम्हालेका पुर्व विधार्थी राजनीतिमा समेत सक्रिय रहेका लाल बहादुर ओलीले चुनावी अभियानमा साथ दिने सम्पूर्ण नेता, कार्यकर्ता तथा शुभेच्छुकप्रति आभार व्यक्त गर्दै यस्तो निर्णय सार्वजनिक गरेका हुन्।
ओलीले निर्वाचन अभियानका क्रममा कार्यकर्ताहरूले देखाएको एकता, मेहनत र प्रतिबद्धताले संगठन अझ बलियो बनेको बताएका छन्। उनले आफूले सो अभियानमा भूमिका निर्वाह गर्न पाएकोमा गर्व महसुस गरेको पनि उल्लेख गरेका छन्।
ओलिका अनुसार, अभियानमा प्रत्यक्ष वा अप्रत्यक्ष रूपमा सहयोग गर्ने सबैप्रति कृतज्ञता व्यक्त गर्दै उनीहरूको साथ र विश्वास सधैं स्मरणीय रहनेछ। वर्तमान राजनीतिक परिवेशप्रति असन्तुष्टि व्यक्त गर्दै उनले त्याग, निष्ठा र इमानदारीभन्दा पैसाको प्रभाव बढ्दै गएकोप्रति दुःख व्यक्त गरेका छन्। यही परिस्थितिलाई मध्यनजर गर्दै आफूले आजदेखि सक्रिय राजनीतिबाट अलग हुने निर्णय गरेको उनले बताएका छन्।
उनले आफ्नो राजनीतिक यात्रामा साथ दिने सबैप्रति धन्यवाद दिँदै, आफ्ना कुनै व्यवहार वा निर्णयले कसैलाई चोट पुगेको भए क्षमा समेत मागेका छन्। ओली लामो समय बिद्यार्थी राजनीति हुँदै युवा नेताको रूपमा काँग्रेसमा स्थापित युवा नेताका रुपमा चिनिन्छ्न।
