रुकुम पश्चिम । रुकुम पूर्वको सिस्ने गाउँपालिकामा कार्यरत २३ वर्षीया कोइली शाही मृत भेटिएको घटना बारे अनुसन्धान माग गर्दै परिवारले प्रहरी समक्ष जाहेरी दिएको छ । मृतक शाहीको परिवारले आइतवार प्रेस चौतारी रूकुम पश्चिमका अध्यक्ष रेडियो सानीभेरीमा कार्यरत पत्रकार परिचन्द्र खत्रीसहितका व्यक्तिविरुद्ध उजुरी दिएर अनुसन्धान गर्न माग गरेको हो ।
गत असार २८ गते बिहान आफ्नै डेरामा झुन्डिएको अवस्थामा मृत फेला परेकी कोइलीको मृत्युलाई रहस्यमय मान्दै परिवारले आइतबार निवेदन दिएको जिल्ला प्रहरी कार्यालय रूकुम पूर्वका प्रमुख डिएसपी उमाशंकर प्रसाद यादवले जानकारी दिए ।
उनले बाहिर किटानी जाहेरी दिएको भनेर आएपनि निवेदन मात्रै आएकोबताए । ‘निवेदन परेको मात्रै हो, किटानी जाहेरी परेको होइन,’ डिएसपी यादवले भने, ‘घटनाको अनुसन्धान भइरहेको छ ।’
मृतक शाही र पत्रकार खत्रीबीच प्रेम सम्बन्ध रहेको बताइन्छ । परिवारले सोही सम्बन्धमा आएको खटपट र मानसिक तनावका कारण कोइलीले आत्महत्याको बाटो रोज्न बाध्य भएको आरोप लगाएको छ । प्रहरीमा उजुरी परेपछि २७ वर्षीय खत्री मोबाइल अफ गरेर सम्पर्कविहीन बनेका छन् ।
