सीता बरालको स्वरमा “बाग्लुङ बेनी” सार्वजनिक ~भिडियो सहित ।

सुजन बिश्वकर्मा

बिहिबार, असार १९, २०८२ मा प्रकाशित

सुजन बिश्वकर्मा

पोखरा असार १९ : प्रविधिको विकास सँगै एक दशक भन्दा लामो समय देखि गीत संगीतको विश्व बजारलाई प्राण दिइरहेको लोकप्रिय डिजिटल प्लेटफर्म युट्यूबमा दिनहुँ असंख्य संख्यामा गीतहरु सार्वजनिक हुने क्रम दिनप्रतिदिन बढिरहेको छ । पछिल्लो समय फराकिलो बन्दै गएको नेपाली गीत संगीतको बजारमा पनि कलाकारहरु एक पछि अर्को प्रस्तुतिहरुले दर्शकहरूलाई आफ्नो आफ्नो सांगीतिक स्वाद पस्किरहेका छन ।

समय सन्दर्भ र पश्चिमी संस्कृतिको प्रत्यक्ष प्रभावमा परेको नेपाली समाजमा पछिल्लो समय गीत संगीतको संरचना पनि त्यस्तै किसिमका बढी देख्न पाइन्छ । एकले अर्कोलाई उछिन्ने र क्षणिक चर्चाको लागि सजिलै पचाउन समेत नसकिने गीत र उस्तै भिडियो सामाग्री तयार पारेर प्रतिस्पर्धात्मक विकृति मौलाउदै गएको बेला एउटा अत्यन्तै मौलिक र नेपालीपनले भरिएको गीत सार्वजनिक भएको छ ।

निकै प्रभावशाली एवं बहु प्रतिभाकि खानी पत्रकार तथा गायिका सीता बरालको सुमधुर स्वरमा सजिएको “बाग्लुङ बेनी” बोलको अत्यन्तै मीठो मौलिक लोकदोहोरी गीत डिजिटल बजारमा सार्वजनिक भएको छ ।

गायिका सीता बरालसँगै बहुचर्चित गायक रेशम निर्दोषको आवाज रहेको उक्त गीतमा रेशम निर्दोषकै शब्द इश्वर सिङको लय तथा विष्णु खत्रीको थेगो रहेको छ भने इन्द्र जि.सीले संगीत संयोजन गरेका छन ।

विभिन्न क्षेत्रमा आफ्नो कुशल प्रतिभा प्रस्तुत गरिसकेकी गायिका सीता बराल स्वयंले अभिनय समेत गरेको उक्त गीतको भिडियोमा सीता बरालसँगै केशव सापकोटाले अभिनय गरेका छन भने रेशम निर्दोष , ईश्वर सिङ लगायत थुप्रै कलाकारहरु समेतलाई छायांकन गरि मौलिक शैलीमा भिडियो निर्माण गरिएको छ ।

करण चैसिरको छायांकन तथा अमृत चापागाईंले सम्पादन गरेको गीतको भिडियो निर्माणमा रेशम निर्दोषको निर्देशन रहेको छ भने रेशम निर्दोषकै आधिकारिक युट्यूब च्यानल मार्फत गीतलाई बजारमा ल्याइएको छ ।

भिडियो हेर्नुहोस् :
https://youtu.be/1QBjriwfJcc?si=LmMuj-aTYRBy6iE6