काठमाडौं । नेकपाका संयोजक पुष्पकमल दाहालले संविधान, संघीय लोकतान्त्रिक गणतन्त्र र जनताले प्राप्त गरेका अधिकारमाथि हुने कुनै पनि प्रहार स्वीकार्य नहुने बताएका छन् ।
संविधान दिवस–२०८३ को अवसरमा शुभकामना सन्देश जारी गर्दै दाहालले संविधानका मूल्य र जनअधिकार कमजोर पार्ने गतिविधिविरुद्ध लोकतान्त्रिक शक्तिहरू एकताबद्ध हुनुपर्ने बताएका हुन् ।
उनले संविधान जारी भएको ११ वर्ष पूरा भए पनि संविधानले परिकल्पना गरेको वास्तविक परिवर्तन अझै पूरा हुन बाँकी रहेको उल्लेख गरेका छन् । संविधानका उपलब्धिलाई जनताको जीवनसँग जोड्नु र बाँकी कार्यभार पूरा गर्नु अहिलेको मुख्य दायित्व भएको उनको भनाइ छ ।
दाहालले नेपालको संविधान केवल कानुनी दस्तावेज नभई नेपाली जनताको लामो संघर्ष, जनआन्दोलन, जनयुद्ध, मधेश आन्दोलनलगायत विभिन्न आन्दोलन र बलिदानबाट प्राप्त राजनीतिक उपलब्धिको संस्थागत अभिव्यक्ति भएको बताएका छन् ।
२०७२ असोज ३ गते संविधानसभाबाट जारी भएको संविधानले संघीय लोकतान्त्रिक गणतन्त्रलाई संस्थागत गर्दै सार्वभौमसत्ता नेपाली जनतामा निहित गरेको उनले उल्लेख गरेका छन् । संविधानले मौलिक अधिकार, सामाजिक न्याय, समानुपातिक समावेशिता, संघीयता, धर्मनिरपेक्षता, गणतन्त्र र लोकतान्त्रिक मूल्य–मान्यतालाई संस्थागत गरेको दाहालले बताएका छन् ।
उनले राष्ट्रिय स्वाधीनता, सार्वभौमसत्ता, भौगोलिक अखण्डता र राष्ट्रिय स्वाभिमानमाथि उत्पन्न हुन सक्ने चुनौतीप्रति सबै सजग हुनुपर्नेमा पनि जोड दिएका छन् । राष्ट्रिय हितको रक्षा कुनै एउटा दल वा शक्तिको मात्र नभई सम्पूर्ण नेपालीको साझा दायित्व भएको उनको भनाइ छ ।
दाहालले राजनीतिक परिवर्तनलाई आर्थिक तथा सामाजिक रूपान्तरणसँग जोड्नुपर्ने बताएका छन् । शिक्षा, स्वास्थ्य, रोजगारी, उत्पादन र समान अवसरमा सबै नागरिकको पहुँच सुनिश्चित गर्दै संविधानका अक्षर मात्र नभई यसको आत्मालाई जनताको दैनिक जीवनमा अनुभूत हुने गरी कार्यान्वयन गर्नुपर्ने उनले बताएका छन् ।
संविधान दिवसका अवसरमा दाहालले देश तथा विदेशमा रहेका सम्पूर्ण नेपालीलाई सुख, शान्ति, समृद्धि र प्रगतिको शुभकामना दिएका छन् ।
