काठमाडौँ । सुशीला कार्की प्रधानमन्त्री भएको एक हप्ता नहुँदै उनको राजीनामा माग गरेर नाराबाजी गरिएको छ । मन्त्री छनोटप्रति असन्तुष्टि जनाउँदै सुदन गुरुङ नेतृत्वको समूहले प्रधानमन्त्री निवास बालुवाटार अगाडि मध्यराति नाराबाजी गरेको हो ।
जेनजीका लिडर भनिने गुरुङको समुहद्वारा प्रधानमन्त्री सुशीला कार्कीविरुद्ध ‘प्रधानमन्त्री राजीनामा दे’, ‘मुर्दामाथि राजनीति नगर’ जस्ता नारा लगाएका थिए ।
आन्दोलनमा मृत्यु भएका व्यक्तिहरूका परिवारका सदस्यहरूसमेत सहभागी युवाहरूले नाराबाजी गरेका हुन् । प्रधानमन्त्री कार्कीले काठमाडौँ महानगरपालिकाका मेयर बालेन शाहका कानुनी सल्लाहकार ओमप्रकाश अर्याललाई गृहमन्त्री, पूर्वअर्थसचिव रामेश्वर खनाललाई अर्थमन्त्री र विद्युत् प्राधिकरणका पूर्व कार्यकारी निर्देशक कुलमान घिसिङलाई ऊर्जा मन्त्रीमा नियुक्त गर्न लागेको सार्वजनिक भएपछि यो विवाद चुलिएको हो ।
