आठबिसकोट । रुकुम पश्चिमको आठबिसकोट -२ पहाडामा रहेको काँडे दहलाई पर्यटकीय क्षेत्र घोषणा गर्न स्थानीय ले माग गरेका छन्। सिस्ने हिमालको काखैमा रहेको काँडा दहलाई रुकुम पश्चिमको पर्यटकीय क्षेत्रका रुपमा घोषणा गर्न स्थानीय हरी बहादुर यरीले सोही क्षेत्रका सांसद जनार्दन शर्मालाई ध्यानआकर्षण गराउदै यरीले काँडादहलाई पर्यटकीय क्षेत्रका रुपमा घोषणा गर्न प्रस्तावना पेश गरेका छन्।

काँडा दह आठबिसकोट नगरपालिकाको प्रमुख पर्यटकीय स्थलहरुमा पर्दछ । यो दह पहाडा गाउँको टुप्पोमा भएकाले यहाँबाट झारमारे, थुमा लेक, स्याला गाउँ तथा खदीका रमणीय क्षेत्रहरु अवलोकन गर्न सकिन्छ । झण्डै २५ सय उचाईमा रहेको यो दह प्रचारप्रसार हुननसक्दा ओझेलमा परेको छ । दहको वरीपरी काँडे सल्लाहरु भएकाले यसलाई काँडा दह भन्ने गरिन्छ ।

यस्तो छ यरीले काँडा दहलाई पर्यटकीय क्षेत्र घोषणा गर्न लेखेको पत्र

श्रीमान् माननीय सांसद / प्रतिनिधिसभा सदस्य
जनार्दन शर्मा[प्रभाकर] ज्यू,

विषय: काँडा दहलाई पर्यटकीय क्षेत्र घोषणा गर्न पहल गरिदिने सम्बन्धमा ।

हालै काँडा दहको प्राकृतिक सौन्दर्य र स्थानिय युवाहरुको योगदानले उक्त स्थलमा विभिन्न सरसफाइ तथा सजावटका कामहरु गरिएको छ। सामाजिक सञ्जालमा टिकटक लगायतका माध्यमबाट काँडा दहको भिडियोले २५ लाख भन्दा बढी दर्शकको ध्यान तानिसकेको छ। यसले यो क्षेत्रको पर्यटन विकासको अपार सम्भावना रहेको पुष्टि गरेको छ।

काँडा दहको संरक्षण तथा प्रचारप्रसार गर्न निम्न बुँदाहरुमा सरकारी ध्यानाकर्षण आवश्यक छ:
१. काँडा दहलाई आधिकारिक रुपमा पर्यटकीय क्षेत्र घोषणा गर्नुपर्ने ।
२. यातायात र पूर्वाधार निर्माणमा सरकारी लगानीको व्यवस्था।
३. पर्यटकका लागि आवश्यक पूर्वाधार (वाटर ट्याङ्की, बासस्थान, शौचालय आदि) को निर्माण।
४. यस क्षेत्रको सांस्कृतिक र प्राकृतिक सम्पदाको संरक्षण र प्रवर्द्धनका कार्यक्रमहरु।

यस क्षेत्रको विकासले न केवल स्थानिय युवालाई रोजगारीको अवसर उपलब्ध गराउँछ, बरु नेपालको पर्यटन क्षेत्रमा नयाँ आयाम थप्ने विश्वास लिएको छु।

अतः, माननीय सांसद जनार्दन शर्मा[प्रभाकर] ज्यू समक्ष काँडा दहलाई पर्यटकीय क्षेत्र घोषणा गर्न जोडदार अनुरोध गर्दछु।

धन्यवाद।
नाम: हरी बहादुर यरी
ठेगाना:आ.न.पा. वडा नं.-०२ पाहाडा रुकुम पश्चिम ।