पोखरा। विश्वकर्मा समाज नेपाल केन्द्रीय कार्यालय, कास्कीले नेपालीहरूका महान् पर्व विजयादशमी, शुभ दीपावली, नेपाल संवत् तथा छठ पर्वको अवसरमा शुभकामना आदानप्रदान कार्यक्रम सम्पन्न गरेको छ।
समाजले आफ्नै भवन, अलकापुर, रामबजारस्थित सभाहलमा गण्डकी प्रदेशसभा सदस्य सरस्वती गुरुङको प्रमुख आतिथ्यतामा कार्यक्रम आयोजना गरेको हो।
कार्यक्रममा प्रमुख अतिथि गुरुङले जातीय विभेद उन्मूलनका लागि संविधान र कानुनमा व्यवस्था भए पनि व्यवहारमा पूर्ण रूपमा कार्यान्वयन हुन नसकेको तीतो यथार्थ अझै कायम रहेको बताइन्। समाजमा विद्यमान विभेदकारी सोच, व्यवहार र संस्कार परिवर्तन गर्न सबै एकताबद्ध भई सचेतनाका साथ अघि बढ्नुपर्नेमा उनले जोड दिइन्।
नवदुर्गाको अवसरमा देवीको तस्बिर तथा पोस्टरमा पूजा गरिए पनि आफ्नै समाजमा रहेका महिलाहरूलाई दलित, जनजाति, मधेसी, कर्णालीवासी तथा पछाडि पारिएका वर्गका नाममा विभिन्न प्रकारले अपमानित र कलङ्कित गर्ने प्रवृत्ति कायम रहनु विडम्बनापूर्ण भएको उनले बताइन्। यस्तो विरोधाभासपूर्ण सामाजिक अवस्थाको अन्त्य गर्न सबैले आफ्नो सोच र व्यवहारमा परिवर्तन ल्याउँदै एकताबद्ध भएर लाग्नुपर्ने उनको भनाइ थियो।
कार्यक्रमका विशिष्ट अतिथि डा. दिनेश विश्वकर्माले विजयादशमीलाई असत्यमाथि सत्यको विजय र अन्यायमाथि न्यायको जितका रूपमा मनाउने गरिए पनि नेपाली समाजमा विद्यमान जातीय विभेदले गम्भीर प्रश्न खडा गरेको बताए। उनले प्रश्न गरे, “के साँच्चिकै असत्यमाथि सत्यको विजय भएको छ? के अन्यायमाथि न्यायको जित भएको छ? के जातीय विभेद सहन बाध्य समुदायले त्यसको वास्तविक अनुभूति गर्न पाएका छन्?”
चाडपर्वले सत्य, न्याय र समानताको सन्देश दिने भए पनि समाजमा जातकै आधारमा विभेद, अपमान र अन्याय सहनुपर्ने अवस्था रहिरहनु दुःखद भएको उनको धारणा थियो। जातीय विभेद भोगिरहेका समुदायका लागि यी प्रश्नहरू अझै पीडादायी रहेको उल्लेख गर्दै उनले विभेदको उचित निराकरण गरी व्यवहारमै समानता र न्याय स्थापित गर्न आवश्यक रहेको बताए।
कार्यक्रमका विशिष्ट अतिथि पोखरा महानगरपालिका वडा नं. १५ की वडा सदस्य मन्दिरा परियारले दलित समुदायको हकहित र अधिकार सुनिश्चित गर्न समाजका सबै वर्गको सोच र विचारमा सकारात्मक परिवर्तन आउनुपर्ने बताइन्। समानता, सम्मान र सामाजिक न्याय स्थापित गर्न सबैको साझा प्रयास आवश्यक रहेकोमा उनले जोड दिइन्।
त्यसैगरी, कार्यक्रममा अतिथिका रूपमा उपस्थित वरिष्ठ पत्रकार कुसुम केशव पराजुलीले शुभकामना मन्तव्य व्यक्त गर्दै दसैँलगायत अन्य चाडपर्व आफ्नो आर्थिक अवस्था र गच्छेअनुसार मनाउन आग्रह गरे। चाडपर्व मनाउने नाममा अनावश्यक तडकभडक र खर्च गर्ने प्रवृत्तिलाई निरुत्साहित गर्नुपर्ने उनको धारणा थियो।
विश्वकर्मा समाज नेपाल केन्द्रीय कार्यालय, कास्कीका अध्यक्ष बेलबहादुर विश्वकर्माको अध्यक्षतामा सम्पन्न कार्यक्रममा समाजकी महिला समिति अध्यक्ष कमला सुनारले स्वागत मन्तव्य राखेकी थिइन् भने कार्यक्रमको सञ्चालन सचिव लालबहादुर घतानेले गरेका थिए।
शुभकामना आदानप्रदान कार्यक्रममा पोखराका उद्योगी, व्यवसायी, जनप्रतिनिधि, सञ्चारकर्मी, कर्मचारी, समाजका सदस्य तथा शुभचिन्तकहरूको उपस्थिति रहेको थियो।
कार्यक्रमले चाडपर्वको शुभकामना आदानप्रदानसँगै जातीय विभेदको अन्त्य, सामाजिक न्यायको स्थापना, समानता र आपसी सद्भाव कायम गर्नुपर्ने सन्देश दिएको थियो। सत्य र न्यायको विजयको प्रतीकका रूपमा मनाइने चाडपर्वलाई सार्थक बनाउन समाजमा विद्यमान विभेदकारी सोच र व्यवहारको अन्त्य गरी सबै नागरिकले समान सम्मान र अधिकार पाउने वातावरण निर्माण गर्नुपर्नेमा कार्यक्रमले जोड दिएको थियो।
