सुदूरपश्चिम प्रदेश सरकारले ल्याएको बजेटप्रति सत्तारूढ दलभित्रै असन्तुष्टि देखिएको छ। यही विषयलाई लिएर नेपाली कम्युनिष्ट पार्टीका केन्द्रीय सदस्य तथा नेकपाका युवा नेता भरत बहादुर बोहरा ‘योगेन्द्र’ ले प्रदेश सरकारको कार्यशैली र संघीयताको औचित्यमाथि उठेका प्रश्नहरुको जवाफदेहिता र जिम्मेवारी कस्ले लिने भन्दै प्रदेश सरकारकालाई प्रश्न गरेका छन् ।
नेता बोहराले सामाजिक सञ्जाल फेसबुकमार्फत आफ्नो धारणा सार्वजनिक गर्दै प्रदेश खारेजीको माग उठिरहेका बेला बजेटसमेत पारित हुन नसक्ने अवस्था सिर्जना भए त्यसको जिम्मेवारी कसले लिने भन्दै प्रश्न गरेका हुन्।
उनले लेखेका छन्, “योजना समेटिए वा समेटिएनन्, त्यो मलाई थाहा भएन। तर प्रदेश खारेजीको माग उठिरहेको बेला दोस्रोपटकको समेत बजेट पास नहुने अवस्था आयो भने यो व्यवस्था रहने कि नरहने कुराको जिम्मा कसले लिने?
प्रदेश सरकारको बजेट र त्यससँग जोडिएको राजनीतिक परिस्थितिप्रति लक्षित गर्दै बोहराले संघीयतामाथि प्रश्न उठिरहेका बेला यस्ता घटनाले व्यवस्थाप्रति जनताको विश्वासमा असर पार्न सक्ने आशय व्यक्त गरेका छन्।
बजेटप्रति सत्तारूढ दलभित्रै असन्तुष्टि
संघीय शासन व्यवस्थाको प्रभावकारिता, प्रदेश सरकारको कार्यसम्पादन र जनअपेक्षाअनुसार विकास निर्माणका योजना कार्यान्वयन हुनुपर्ने विषयमा बहस भइरहेका बेला सत्तारूढ दलकै नेताबाट आएको यस्तो अभिव्यक्तिलाई अर्थपूर्ण रूपमा हेरिएको छ।
प्रदेशको औचित्यमाथि प्रश्न उठिरहेका बेला बजेटसम्बन्धी विवादले राजनीतिक रूपमा थप बहस सिर्जना गरेको छ। बजेट निर्माण, योजना छनोट र पारित प्रक्रियामा देखिने असन्तुष्टिले प्रदेश सरकारको राजनीतिक समन्वय र जवाफदेहितामाथि समेत प्रश्न उठाएको छ।
यद्यपि, प्रदेश सरकारको बजेट पारित हुने नहुने केहि टुङ्गो लागेको छैन, नेकपा नेता तथा प्रदेश सांसदहरुले समेत यथास्थितिमा बजेट पारित हुन नसक्ने भन्दै भिभिन्न मिडियाहरुमा अभिव्यक्ति दिइरहेका छन् ।
