काठमाडौँ । प्रधानमन्त्री वालेन्द्र शाहको सल्लाहकार तथा स्वकीय सचिवालयमा २५ जना कार्यरत रहेको विवरण सार्वजनिक भएको छ।
प्रधानमन्त्री तथा मन्त्रिपरिषद्को कार्यालयले शुक्रबार प्रधानमन्त्रीका सल्लाहकार, विज्ञ तथा स्वकीय सचिवालयमा कार्यरत पदाधिकारी र कर्मचारीको नाम तथा जिम्मेवारी सार्वजनिक गरेको हो। यसअघि प्रधानमन्त्रीको सचिवालयमा नियुक्त व्यक्तिहरूको संख्या सार्वजनिक भए पनि सबैको नाम र जिम्मेवारीसहितको विवरण सार्वजनिक गरिएको थिएन।
सार्वजनिक विवरणअनुसार प्रधानमन्त्रीको सल्लाहकार समूहमा मुख्य सल्लाहकार कुमार ब्यञ्जनकार, राजनीतिक सल्लाहकार असिम शाह, नीति, प्रशासन तथा सुशासन सल्लाहकार सुदीप ढकाल, सूचना तथा सञ्चार प्रविधि सल्लाहकार विवेक मिश्र र स्वास्थ्य सल्लाहकार प्रा.डा. जगदीशप्रसाद अग्रवाल छन्।
ब्यञ्जनकार र अग्रवाल अवैतनिक सल्लाहकारका रूपमा रहेको विवरणमा उल्लेख छ। असिम शाहलाई मन्त्रीसरह तथा सुदीप ढकाल र विवेक मिश्रलाई राज्यमन्त्रीसरहको सेवा–सुविधा तोकिएको छ।
प्रमुख स्वकीय सचिवमा सुवास शर्मा
प्रधानमन्त्रीको प्रमुख स्वकीय सचिवमा सुवास शर्मा छन्। उनले राजपत्राङ्कित विशिष्ट श्रेणी अर्थात् सचिवसरहको सुविधा पाउनेछन्।
स्वकीय सचिव नवीन भण्डारी, विकास परियोजनातर्फ स्वकीय सहसचिव सञ्जीव पाण्डे, प्रेस तथा अनुसन्धान विज्ञ दीपा दाहाल, कार्यक्रम तथा भ्रमण संयोजक सन्तोष गिरी र सामाजिक विकास विज्ञ विश्व राईलाई राजपत्राङ्कित प्रथम श्रेणी अर्थात् सहसचिवसरहको सुविधा तोकिएको छ।
त्यस्तै, प्रकृति ढकाल, विशाल अधिकारी र विनय शाक्य उपसचिवसरहको जिम्मेवारीमा छन्। नागरिक उड्डयनतर्फ सहायक विज्ञ सुमन गौतम र भाषा तथा मस्यौदातर्फ सहायक विज्ञ रविकिरण अधिकारीले पनि उपसचिवसरहको सुविधा पाउने सार्वजनिक विवरणमा उल्लेख छ।
प्रेसदेखि अनुसन्धानसम्म छुट्टाछुट्टै जिम्मेवारी
प्रधानमन्त्रीको सचिवालयमा प्रेस, अनुसन्धान, ग्राफिक्स, भिडियोग्राफी तथा प्रशासनिक कामका लागि समेत छुट्टाछुट्टै जनशक्ति राखिएको छ।
प्रेस सहजकर्तामा सुरेन्द्र बजगाईँ, ग्राफिक्स डिजाइनतर्फ रोशन तामाङ तथा अनुसन्धान अधिकृतका रूपमा बेदानन्द जोशी र हेम नारायणदास चौधरी कार्यरत छन्। उनीहरू शाखा अधिकृतसरहको तहमा रहेको विवरणमा उल्लेख छ।
प्रशासन सहायकतर्फ अनुप थापामगर, ऋषि थापा, राजकुमार गौतम र बेनिस कार्की तथा कम्प्युटर सहायकका रूपमा अमृत पाण्डे कार्यरत छन्। उनीहरू नायब सुब्बासरहको तहमा रहेको सार्वजनिक विवरणमा उल्लेख छ।
यससँगै प्रधानमन्त्रीको सल्लाहकार, विज्ञ तथा स्वकीय सचिवालयमा कार्यरत २५ जनाको नाम र जिम्मेवारी सार्वजनिक भएको हो।
यसअघि २७ जना नियुक्त भएको विवरण
प्रधानमन्त्री कार्यालयले यसअघि उपलब्ध गराएको विवरणमा भने स्वकीय सचिवालयतर्फ ४८ जनाको दरबन्दीमध्ये २७ जना नियुक्त भएको उल्लेख थियो। असोज १३ गते प्रकाशित विवरणमा पनि कार्यालयले भदौ १५ गते उपलब्ध गराएको सूचनाका आधारमा २७ जना नियुक्त रहेको उल्लेख गरिएको थियो।
शुक्रबार सार्वजनिक गरिएको नामावलीमा भने सल्लाहकार, विज्ञ तथा स्वकीय सचिवालयसहित २५ जनाको विवरण समेटिएको छ। यसअघि उल्लेख गरिएका २७ जनाबाट संख्या घट्नुको कारणबारे सार्वजनिक विवरणमा स्पष्ट उल्लेख छैन।
शाह गत चैत १३ गते प्रधानमन्त्रीमा नियुक्त भएका हुन्। प्रधानमन्त्री तथा मन्त्रिपरिषद्को कार्यालयको आधिकारिक विवरणअनुसार उनले २७ मार्च २०२६ मा प्रधानमन्त्रीको पदभार सम्हालेका थिए।
