काठमाडौं । उद्योग, वाणिज्य तथा आपूर्ति मन्त्री गौरी कुमारी यादवले पदबाट राजीनामा दिएपछि नेपाली कांग्रेसका नेता बाबुराम आचार्यले उनको राजीनामा स्वागत योग्य भएको बताएका छन्।
आचार्यले मन्त्री यादवले प्रधानमन्त्री बालेन्द्र शाहसमक्ष दिएको राजीनामा तत्काल स्वीकृत हुनुपर्ने धारणा व्यक्त गरेका छन्। उद्योगी तथा व्यापारीप्रति यादवले दिएको अभिव्यक्तिको आलोचना गर्दै उनले मन्त्री पदको गरिमा कायम राख्न नसक्ने व्यक्तिलाई जिम्मेवार पदमा राख्न नहुने बताएका हुन्।
आचार्यका अनुसार मुलुकको अर्थतन्त्र र उद्योग व्यवसायमा योगदान पुर्याउँदै आएका उद्योगी तथा व्यापारीप्रति अपमानजनक अभिव्यक्ति दिनु उचित नभएको भन्दै त्यस्ता अभिव्यक्तिमाथि कानुनी रूपमा समेत छानबिन हुनुपर्ने आवश्यकता छ।
यादवले उद्योगी तथा व्यापारीलाई ‘पाता कस्नुपर्ने’ लगायतका अभिव्यक्ति दिएको विषयलाई गम्भीर रूपमा लिनुपर्ने बताउँदै आचार्यले मन्त्रीबाट राजीनामा दिएर मात्रै विषय टुंगिन नहुने टिप्पणी गरेका छन्।
उनले मन्त्रीजस्तो गरिमामय पदमा पुग्ने व्यक्तिको छनोटमा प्रधानमन्त्री तथा राजनीतिक दलहरूले गम्भीर ध्यान दिनुपर्ने बताए। साथै, सांसद चयन गर्दा जनताले पनि उम्मेदवारको योग्यता, आचरण र राजनीतिक जिम्मेवारीप्रति थप ध्यान दिनुपर्ने उनको भनाइ छ।
‘यादवजस्ता सांसद र मन्त्रीका कारण देशको राजनीति नै बदनाम हुने अवस्था देखिएको छ,’ आचार्यले भने, ‘मन्त्री नियुक्त गर्दा प्रधानमन्त्रीले र सांसद चुन्दा जनताले अझ बढी ध्यान दिनुपर्ने देखिन्छ।’
आचार्यले सार्वजनिक पदमा रहने व्यक्तिबाट जिम्मेवार, मर्यादित र संयमित अभिव्यक्तिको अपेक्षा गरिने भन्दै राजनीतिक नेतृत्वले आफ्नो व्यवहार र अभिव्यक्तिप्रति गम्भीर हुनुपर्नेमा जोड दिएका छन्।
