काठमाडौँ । बाढी–पहिरोका कारण नागढुंगा–मुग्लिन सडक अवरुद्ध भएपछि काठमाडौँ उपत्यकामा खाना पकाउने एलपी ग्यासको आपूर्ति प्रभावित भएको छ। सम्भावित अभाव र कृत्रिम मूल्यवृद्धि रोक्न सरकारले वैकल्पिक ढुवानी व्यवस्था अघि बढाएको छ।
बिहीबारदेखि दैनिक २ सय वटा ट्रक परिचालन गरी तराईका उद्योगबाट ग्यास भरेर उपत्यकामा ल्याइने भएको छ। यसका लागि उपत्यकामा खाली भएका सिलिन्डरमध्ये दैनिक १ सय ट्रक तराईतर्फ पठाइने र अर्को १ सय ट्रक भरिएका सिलिन्डर लिएर काठमाडौँ फर्किने व्यवस्था मिलाइएको छ।
नागढुंगा–मुग्लिन सडक अवरुद्ध हुँदा काठमाडौँ, काभ्रे र धादिङका १८ वटा ग्यास उद्योगमा ठूला बुलेटमार्फत ग्यास पुर्याउन नसकिएपछि हेटौँडा, चितवन, नवलपरासी र वीरगन्ज क्षेत्रका उद्योगमा सिलिन्डर रिफिल गरेर ल्याउने तयारी गरिएको हो।
नेपाल एलपी ग्यास उद्योग सङ्घ, नेपाल आयल निगम र यातायात व्यवसायीबीचको सहमतिअनुसार यस्तो वैकल्पिक ढुवानी सुरु गर्न लागिएको हो। सङ्घका अध्यक्ष दिवानबहादुर चन्दका अनुसार सुरुवाती चरणमा केही ट्रक परिचालन भइसकेका छन् भने बिहीबारदेखि पूर्ण क्षमतामा २ सय ट्रक सञ्चालन गरिनेछ।
ठूला ग्यास बुलेटलाई कान्ति लोकपथ र त्रिभुवन राजपथ हुँदै ल्याउन सडक साँघुरो र जोखिमयुक्त देखिएपछि बुलेटबाट तराईमै ग्यास अनलोड गरी १५ टन क्षमताका साना तथा मझौला ट्रकमार्फत उपत्यका ल्याउने व्यवस्था गरिएको हो।
सरकारले ढुवानीका क्रममा मनपरी भाडा असुली रोक्न दूरीअनुसार भाडादरसमेत निर्धारण गरेको छ। हेटौँडाबाट काठमाडौँसम्म दुईतर्फी ढुवानीका लागि १२ चक्के ट्रकको भाडा ८० हजार रुपैयाँ, चितवनबाट ९३ हजार, वीरगन्ज/कलैयाबाट ९५ हजार र नवलपुरबाट ९८ हजार रुपैयाँ तोकिएको छ।
यसैबीच, नेपाल आयल निगमले विपद्को अवस्थामा घरायसी उपभोक्तालाई पहिलो प्राथमिकता दिने जनाएको छ। होटल तथा रेस्टुरेन्टलगायत व्यावसायिक उपभोक्ताले भने तत्कालका लागि सम्बन्धित तराईका प्लान्टबाट आफ्नै खर्चमा ग्यास ल्याउनुपर्ने व्यवस्था गरिएको छ।
दैनिक २ सय ट्रक पूर्ण क्षमतामा परिचालन भएपछि उपत्यकामा देखिएको एलपी ग्यास अभावको जोखिम र बजारमा हुनसक्ने कृत्रिम मूल्यवृद्धि नियन्त्रण हुने अपेक्षा गरिएको छ।
