जिल्लामा भारी वर्षाका कारण मध्यपहाडी लोकमार्गअन्तर्गत विभिन्न स्थानमा पहिरो खसेर सडक अवरुद्ध भएपछि रातिको समयमा सवारी आवागमनमा रोक लगाइएको छ ।
जिल्ला प्रशासन कार्यालय रुकुम पूर्वले शुक्रबार सूचना जारी गर्दै जिल्लाअन्तर्गत पर्ने पुष्पलाल (मध्यपहाडी) राजमार्गको काँडाबगर र धौलापहिरालगायतका क्षेत्रमा पहिरो आएर सडक अवरुद्ध भएको जनाएको छ ।
जल तथा मौसम विज्ञान विभाग, मौसम पूर्वानुमान महाशाखाको सूचनाअनुसार केही दिन अझै वर्षाको सम्भावना रहेकाले जिल्ला सुरक्षा समितिको बैठकको निर्णयअनुसार मध्यपहाडी लोकमार्ग भएर सञ्चालन हुने सबै प्रकारका सवारी साधनलाई साउन २९ गते बेलुकी ९ बजेदेखि ३० गते बिहान ९ बजेसम्म आवागमनमा रोक लगाइएको हो ।
भारी वर्षाका कारण सडकमा थप पहिरो खस्न सक्ने तथा यात्राका क्रममा जोखिम बढ्न सक्ने भएकाले सम्भावित दुर्घटना न्यूनीकरणका लागि रातिको समयमा सवारी आवागमन रोक्ने निर्णय गरिएको जिल्ला प्रशासन कार्यालय रुकुम पूर्वले जनाएको छ ।
यात्रा गर्नुअघि मौसमको पूर्वानुमान, वर्षाको अवस्था तथा सडकको अवस्थाबारे जानकारी लिएर मात्र यात्रा गर्न प्रशासनले सबैमा अनुरोध गरेको छ । साथै, जोखिमयुक्त क्षेत्रमा अनावश्यक यात्रा नगर्न र सडकको अवस्था बुझेर मात्र यात्रा गर्न आग्रह गरिएको छ ।
जिल्ला प्रशासन कार्यालय रुकुम पूर्वका सहायक प्रमुख जिल्ला अधिकारी समीर गौतमले भारी वर्षाका कारण सडकमा थप पहिरो खस्न सक्ने र यात्रा जोखिमपूर्ण हुन सक्ने भएकाले सम्भावित दुर्घटना न्यूनीकरणका लागि रातिको समयमा सवारी आवागमनमा रोक लगाइएको जानकारी दिए ।
