रुकुमपश्चिम । रुकुम पश्चिमका भुकम्प प्रभावितका लागि नीजी आवास पुननिर्माण गर्न पहिलो किस्ता रकम माग गरिएको छ । २०८० कात्तिक १७ गते जाजरकोट केन्द्रबिन्दु भएर गएको भूकम्पबाट क्षति भएका रुकुमपश्चिमका निजी आवास पुनर्निर्माणका मङ्गलबार जिल्ला विपद् व्यवस्थापन समितिको बैठकले ७६६ जना लाभग्राहीको आवास निर्माणका लागि पहिलो किस्ताको रकम माग गर्ने निर्णय गरेको हो ।
समितिको बैठकमा भूकम्प प्रभावित निजी आवास पुनर्निर्माण कार्यविधि, २०८०’ (संशोधनसहित) बमोजिम सम्झौता गरी आवश्यक कागजात तथा प्रक्रिया पूरा गरेका लाभग्राहीका लागि आवास निर्माणको अनुदान माग गर्ने निर्णय भएको प्रमुख जिल्ला अधिकारी निशानराज गौतमले जानकारी दिए।
स्थानीय विपद् व्यवस्थापन समितिबाट रकम माग भई आएका लाभग्राहीको विवरण रुजु गरेर राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग प्रथम किस्ताको रकम निकासा गर्न माग गरिएको हो।
प्रशासनका अनुसार पुनर्निर्माणका मुसीकोट नगरपालिकाका ६५ जना, चौरजहारी नगरपालिकाका १६२ जना, त्रिवेणी गाउँपालिकाका ३०२ जना र सानीभेरी गाउँपालिकाका २३७ जना लाभग्राहीका लागि पहिलो किस्ता माग गरिएको हो ।
आठबिसकोट नगरपालिका र बाँफिकोट गाउँपालिकाबाट भने पहिलो किस्ताका लागि प्रक्रिया पूरा गरी रकम माग गरिएको विवरण प्राप्त नभएको प्रशासन कार्यालयले जनाएको छ ।
रुकुम पश्चिममा भूकम्पका कारण ३० हजार ८५० घरको क्षतिको विस्तृत विवरण प्राधिकरणले तयार गरेको छ ।
