रुकुम पश्चिमको आठबिसकोटमा रहेको राडीज्युला शिक्षा क्याम्पस सञ्चालक समितिको अध्यक्षमा नेकपाका उम्मेदवार पराजित भएपछि नेकपा कर्णाली प्रदेश समिती सचिवालय सदस्य रवि केसीले पद बाट राजीनामा दिएका छन् ।
केसीले आफू समेत सहभागी भएर गरिएको निर्णय कार्यान्वयन हुन नसकेको भन्दै नैतिक जिम्मेवारी स्वीकार गर्दै पार्टीले दिएको जिम्मेवारीबाट अलग हुने घोषणा गरेका हुन्। यद्यपि उनको राजीनामा स्वीकार गर्ने नगर्ने भने कमिटीमा छलफल हुने बताईएको छ ।
उनले निर्णय कार्यान्वयन हुन नसकेको अवस्थाको सम्पूर्ण जिम्मेवारी आफ्नो भागमा पर्ने स्वीकार गर्दै पार्टीले प्रदान गरेको पार्टी कमिटीको जिम्मेवारीमा अब नरहने उज्यालोपाटी लाई जानकारी दिए।
साथै, उक्त निर्णयबारे पार्टी कमिटी तथा सम्बन्धित सबै पक्षलाई औपचारिक रूपमा जानकारी गराइएको पनि बताएका छन् । हिजो सप्पन्न क्याम्पसको निर्वाचनमा नेकपाको तर्फबाट जनक बटाला उम्मेदवार बनेका थिए। उनका प्रतिस्पर्धी हरिभक्त क्षेत्रीले ८ मतले जितेका थिए। क्षेत्रीले ७३ भोट ल्याउदा बटालाले ६५ भोट प्राप्त गरेका थिए।
गएको ०७९ को स्थानीय तह निर्वाचनमा लोकप्रिय मत सहित आठबिसकोट नगरपालिकाको नगर प्रमुखमा निर्वाचित भएका केसीले पार्टी कमिटी बाट राजीनामा दिएपछि स्थानीय राजनीतिमा नयाँ तरंग सिर्जना भएको छ। यस अघि नेकपा माओवादी केन्द्र हुँदा गोर्ख बहादुर केसी सन्देशले पार्टी छोडेर प्रलोपामा गएपछि आठबिसकोटमा शक्तिशाली युवा नेताका रुपमा रहेका केसीको राजीनामाले फेरि राजनीतिक बहस जन्माएको छ ।
लामो समयदेखि पार्टी संगठनको नेतृत्व गर्दै आएका उनी आगामी स्थानीय निर्वाचनमा पुनः मेयरको उम्मेदवार बन्न सक्ने चर्चा चलिरहेका बेला जिम्मेवारीबाट अलग हुने निर्णयले विभिन्न राजनीतिक अड्कलबाजीलाई फेरि जन्म दिएको छ।
उनले यसअघि फागुनमा सम्पन्न संघीय निर्वाचनमा नेकपाका उम्मेदवारको पक्षमा उल्लेखनीय भूमिका खेलेका थिए। चुनावी अभियानदेखि कार्यकर्ता परिचालन र जनसम्पर्कसम्म उनको सक्रिय सहभागिताले उम्मेदवारको जितमा महत्वपूर्ण योगदान पुगेको भन्दै समर्थकहरूले उनको प्रशंसा समेत गरेका थिए।
आठबिसकोटमा पार्टीका प्रमुख नेतामध्ये एक मानिने उनी पुनः मेयरको उम्मेदवार बन्ने चर्चा व्यापक रूपमा चलिरहेका बेला आएको राजीनामालाई धेरैले अर्थपूर्ण राजनीतिक कदमका रूपमा हेरेका छन्। यस निर्णयले आगामी निर्वाचनको समीकरणमा नयाँ बहस र चासो थपेको छ।
यद्यपि, उनले राजीनामा दिनुको वास्तविक कारण भने आफुले समर्थन गरेको र प्रमुख जिम्मेवारी आफ्नो भएकोले नैतिकताको आधारमा राजीनामा दिएको प्रष्ट पारेका छन् ।
उनको राजीनामाले आठबिसकोटको आगामी राजनीतिक दिशा र स्थानीय निर्वाचनको प्रतिस्पर्धामा नयाँ मोड ल्याउन सक्ने अनुमान गरिएको छ।
