रुकुम पश्चिम। यहाँको आठविसकोट नगरपालिका पूर्ण खोप सुनिश्चितता तथा दिगोपना पालिका घोषणा भएको छ। “स्थानीय स्रोतको उपयोग, स्वामित्व र सहभागिताः पूर्ण खोप सुनिश्चितता हाम्रो प्रतिबद्धता” भन्ने मूल नाराका साथ आयोजित कार्यक्रम आवश्यक सम्पूर्ण प्रक्रिया पूरा गरी सम्पन्न गरिएको हो।
कार्यक्रमको अध्यक्षता आठविसकोट नगरपालिकाका नगर प्रमुख तथा पालिका खोप समन्वय समितिका अध्यक्ष रवि के.सी.ले गर्नुभएको थियो। कार्यक्रममा स्वास्थ्य सेवा कार्यालयका जनस्वास्थ्य अधिकृत कालीबहादुर पुन, निमित्त प्रमुख प्रशासकीय अधिकृत,राजेश गौतम नगरपालिकाका विभिन्न वडाका वडाध्यक्षहरू, स्वास्थ्य संस्था प्रमुख तथा स्वास्थ्यकर्मीहरू, विषयगत शाखाका प्रमुख तथा कर्मचारीहरू, महिला सामुदायिक स्वास्थ्य स्वयंसेविकाहरू लगायत सरोकारवाला निकायका प्रतिनिधिहरूको सहभागिता रहेको थियो।
कार्यक्रमका अवसरमा नगर प्रमुख रवि के.सी.ले पूर्ण खोप सुनिश्चितता तथा दिगोपना घोषणा सम्पन्न गरेका वडाहरूका वडाध्यक्ष तथा स्वास्थ्यकर्मीहरूलाई प्रमाणपत्र वितरण गर्नुभएको थियो। साथै पूर्ण खोपको दिगोपना कायम राख्ने प्रतिबद्धता पत्रमा हस्ताक्षर गर्दै खोप अभियानलाई थप प्रभावकारी र दिगो बनाउने प्रतिबद्धता व्यक्त गरिएको थियो।
नगरपालिकाले बालबालिकालाई नियमित खोप सेवामा पहुँच सुनिश्चित गर्दै पूर्ण खोपयुक्त समुदाय निर्माणमा उल्लेखनीय सफलता हासिल गरेको जनाइएको छ। कार्यक्रममा सहभागीहरूले पूर्ण खोप सुनिश्चितताको उपलब्धिलाई निरन्तर कायम राख्दै आगामी दिनमा समेत खोप कार्यक्रमलाई प्रभावकारी रूपमा सञ्चालन गर्ने प्रतिबद्धता व्यक्त गरेका थिए
