ललितपुर। बागमती प्रदेश सुशासन केन्द्र, जावलाखेल, ललितपुरद्वारा आयोजित “स्थानीय तहका न्यायिक समितिका संयोजक (उपप्रमुख/उपाध्यक्ष) तथा सहजकर्ताहरूका लागि स्थानीय तहका न्यायिक समितिबाट सम्पादित असल अभ्यास र फैसला लेखन सम्बन्धी अन्तरक्रिया कार्यक्रम” सफलतापूर्वक सम्पन्न भएको छ।
कार्यक्रमको प्रमुख आतिथ्य बागमती प्रदेश सरकारका माननीय मुख्यमन्त्री इन्द्रबहादुर बानियाँ ज्यूले गर्नुभएको थियो। उहाँले स्थानीय तहका न्यायिक समितिको भूमिकालाई अझ प्रभावकारी, पारदर्शी र नागरिकमैत्री बनाउन यस्तो किसिमका क्षमता विकास तथा अनुभव आदान–प्रदान कार्यक्रम महत्वपूर्ण हुने बताउनुभयो।
जावलाखेलस्थित सुशासन केन्द्र मा सम्पन्न उक्त कार्यक्रममा स्थानीय तहका न्यायिक समितिका संयोजक तथा सहजकर्ताहरूको सहभागिता रहेको थियो। सहभागीहरूले न्यायिक समितिबाट सम्पादित कार्यप्रक्रिया, असल अभ्यासहरू तथा फैसला लेखनका व्यावहारिक चुनौती र समाधानका विषयमा छलफल गरेका थिए।
कार्यक्रममा न्यायिक समितिको कार्यक्षमता अभिवृद्धि, कानुनी प्रक्रिया सुधार तथा स्थानीय स्तरमा विवाद समाधानलाई प्रभावकारी बनाउन आवश्यक सुझावहरू समेत आदान–प्रदान गरिएको आयोजकले जनाएको छ।
