रुकुम पश्चिम । आठबिसकोट नगरपालिका स्थित पिस जोन बोर्डिङ स्कूलले शिक्षकहरूको पेशागत विकास तथा क्षमता अभिवृद्धीका लागि सुरु गरेको ६ दिने विशेष तालिम सम्पन्न भएको छ । विद्यालय परिसरमा आयोजित उक्त तालिममा विभिन्न विषयका शिक्षकहरूको सक्रिय सहभागिता रहेको थियो। भने बिषयगत प्रशिक्षकहरुले प्रशिक्षण दिएका हुन् ।
उक्त तालिमको उद्देश्य शिक्षण सिकाइ प्रक्रियालाई अझ प्रभावकारी, व्यवहारिक र विद्यार्थीमैत्री बनाउनु रहेको विद्यालय प्रशासनले जनाएको छ। कार्यक्रममा आधुनिक शिक्षण विधि, कक्षाकोठा व्यवस्थापन, विद्यार्थी मूल्याङ्कन प्रणाली, तथा सूचना प्रविधिको प्रयोग जस्ता विषयमा प्रशिक्षण प्रदान गरिएको थियो।
तालिममा प्रशिक्षकहरु थलबिर ओली,तेज बहादुर सिङ,मान बहादुर चन्द,राम बहादुर ओली,इन्द्र बहादुर बिष्ट,नरेन्द्र कार्की,नयना चन्द,विवेक कुमार शाह,नवीन कुमार शाही र जंग बहादुर पुनले प्रशिक्षण दिएका थिए ।
कार्यक्रमका प्रमुख प्रशिक्षकले शिक्षकहरूलाई समयानुकूल शिक्षण शैली अपनाउन र विद्यार्थीको व्यक्तिगत क्षमता पहिचान गरी शिक्षण गर्न सुझाव दिएका थिए। सहभागी शिक्षकहरूले तालिम अत्यन्त उपयोगी र प्रेरणादायी भएको प्रतिक्रिया दिएका छन्।
विद्यालयका प्रधानाध्यापकले यस्ता तालिमले शिक्षकहरूको दक्षता अभिवृद्धि गर्नुका साथै समग्र शिक्षाको गुणस्तर सुधारमा महत्वपूर्ण योगदान पुर्याउने विश्वास व्यक्त गरे। उनले आगामी दिनमा पनि यस्ता कार्यक्रमहरूलाई निरन्तरता दिइने जानकारी दिए।
स्थानीय अभिभावक तथा सरोकारवालाहरूले पनि विद्यालयको यस पहललाई सकारात्मक रूपमा लिँदै शिक्षामा सुधार ल्याउन यस्ता कार्यक्रम आवश्यक रहेको बताएका छन्।
