रुकुम पश्चिम । रुकुम पश्चिमको मुसिकोट नगरपालिकामा पछिल्लो डेढ महिनादेखि फोहोर संकलन नभएको भन्दै स्थानीय बासिन्दा आक्रोशित भएका छन्। लामो समयसम्म फोहोर नउठ्दा बजार क्षेत्र तथा बस्तीहरूमा दुर्गन्ध फैलिनुका साथै वातावरणीय र स्वास्थ्यसम्बन्धी समस्या बढ्न थालेको स्थानीयको गुनासो छ।
फोहोर व्यवस्थापन गर्न नसक्दा नगर प्रमुख महेन्द्र केसीको कार्यशैली माथी नै प्रश्न उठ्न थालेको छ । फोहोर व्यवस्थापनलाई चासो नदिएको समेत बताईन्छ ।स्थानीयका अनुसार मुसिकोट बजारसहित विभिन्न वडामा करिब एक महिनादेखि नियमित रूपमा फोहोर संकलन हुन सकेको छैन। घर-घर र सडकछेउमा थुप्रिएको फोहोरका कारण सर्वसाधारणलाई आवतजावत गर्नसमेत समस्या हुन थालेको छ। यस अघि फोहोर फाल्दै आएको वडा नम्वर २ मा स्थानीयले अवरोध गरेपछि समस्या आएको हो।
“पहिले हप्तामा एक,दुई पटक फोहोर उठ्थ्यो, तर अहिले एक महिनासम्म पनि कोही लिन आएको छैन,” एक स्थानीयले बताए। उनका अनुसार फोहोर थुप्रिँदा दुर्गन्ध फैलिएको छ र यसले स्वास्थ्य जोखिमसमेत बढाएको छ।
मुसिकोटका स्थानीय व्यवसायीहरूले पनि फोहोर व्यवस्थापन नहुँदा बजार क्षेत्रको सौन्दर्य बिग्रिएको र व्यापारमा समेत असर परेको बताएका छन्। उनीहरूले नगरपालिकालाई तत्काल फोहोर व्यवस्थापनको स्थायी समाधान गर्न आग्रह गरेका छन्।
यता मुसिकोट नगरपालिकाले भने फोहोर व्यवस्थापनमा केही प्राविधिक तथा व्यवस्थापकीय समस्या आएको स्वीकार गरेको छ। नगरप्रमुख महेन्द्र केसीले उज्यालोपाटी सँग भने, हालसम्म फोहोर फाल्दै आएको स्थानमा अवरोध भएको छ । हामिले वडा नम्वर१ को निपानेमा दीर्घकालीन रुपमा फोहोर व्यवस्थापनको लागी फिल्ड निर्माण गर्दैछौं । असार मसान्तसम्म फिल्ड निर्माण हुन्छ । अहिलेलाई हामी स्थानीय सँग निरन्तर छलफलमा छौँ । सहमति जुटाएर बजारको फोहोर चाँडै उठाउँछौँ।
नगरपालिकाका प्रमुख प्रशासकीय अधिकृत गौरी प्रसाद आचार्यका अनुसार समस्या समाधानका लागि पहल भइरहेको र छिट्टै नियमित रूपमा फोहोर संकलन सुरु गरिने उज्यालोपाटी लाई बताए।
स्थानीयहरूले भने समस्या लामो समयसम्म दोहोरिन नदिन नगरपालिकाले प्रभावकारी योजना बनाएर फोहोर व्यवस्थापनलाई नियमित बनाउनुपर्ने माग गरेका छन्। नगरपालिकाले वडा नम्वर २ का स्थानीय सँग छलफल गरेपनी उनीहरू फोहोर फाल्न नदिने भएका छन् । लामो समय देखि बजार क्षेत्रमा फोहोर कुहिँदा त्यहाँका स्थानीयले सास्ती खेप्दै आएका छन् ।
