रुकुम पश्चिम । दुई दशकभन्दा बढी समयदेखि रुकुम पश्चिम बाट राजनीति र संसदमा सक्रिय रहेका प्रगतिशील लोकतान्त्रिक पार्टीका नेता जनार्दन शर्मामाथि अहिले गाउँगाउँबाट प्रश्न उठ्न थालेको छ। स्थानीय बासिन्दाहरूले आधारभूत आवश्यकता पूरा नहुँदा असन्तुष्टि व्यक्त गरेका छन्। रुकुम पश्चिमको सानीभेरी-४ का एक ज्येष्ठ नागरिकले भने, “२० वर्षसम्म सांसद हुँदा समेत हाम्रो टोलमा खानेपानीको व्यवस्था हुन सकेन। अहिले फेरि भोट माग्न आउँदा हामीले के आधारमा विश्वास गर्ने?”
स्थानीय युवाहरूको पनि उस्तै गुनासो छ। उनीहरू भन्छन्, विकासका ठूला भाषणभन्दा पनि गाउँमा देखिने काम चाहिएको छ। खानेपानी, सडक, स्वास्थ्य र रोजगारीजस्ता विषय अझै समाधान हुन नसकेको उनीहरूको दाबी छ। सानीभेरी-४ का दल बहादुर बुढा भन्छन् , जनयुद्ध देखि नै माओवादी भैयो। अहिले पनि मनमुटुमा माओवादी छ । तर हामिले नेता मानेका जनार्दनले हामिलाई छोडे ।
लामो समय सत्तामा बसेका नेताहरूमाथि परिणाम देखाउने दबाब स्वाभाविक हो। जनताको अपेक्षा बढ्दै गएकाले अब नारामात्र होइन, प्रत्यक्ष उपलब्धि देखिनुपर्ने राजनीतिक बिश्लेषखरुको भनाइ छ।
आगामी निर्वाचन नजिकिँदै गर्दा मतदाताहरूले यसपटक विगतको कामको मूल्यांकन गरेर निर्णय गर्ने संकेत दिएका छन्। “अब आश्वासन होइन, परिणाम चाहिन्छ,” एक स्थानीय मतदाताले भने। रुकुम पश्चिममा चुनावी माहोल तात्दै जाँदा जनताको यस्तो प्रश्नले राजनीतिक बहसलाई थप चर्काएको छ।
