पोखरा महानगरपालिका अन्तर्गत विभिन्न स्थानहरुमा मादक पदार्थ सेवन गरि विद्यालयको बस चलाइरहेको अवस्थामा ५ जना बस चालकहरुलाई जिल्ला प्रहरी कास्कीले नियन्त्रणमा लिएको छ ।
बुधबार बिहान करिब ०९:३० बजेको समयमा जिल्ला प्रहरी कार्यालय कास्की तथा मातहत समेत बाट ट्राफिक प्रहरी सहित खटिएको प्रहरी चेकिङ टोलीले विद्यालय बस चालकहरुलाई मा.प.से. चेकजाँच गर्दा मा.प.से. गरेको पाइएपछि आवश्यक कारबाहीको लागि प्रक्रिया अगाडि बढाउन चालकहरुलाई प्रहरीले नियन्त्रणमा लिएको हो ।
भिन्न भिन्न विद्यालयले सञ्चालनमा लाएका ५ विद्यालयका चालकहरु नियन्त्रणमा परेका हुन जसमा माउन्ट हेभेन बोर्डिङ स्कुलको ग १ क ६७७४ नम्बरको बस चालक ३३ वर्षीय आनन्द परियार ,कुमुदिनी होम्स बोर्डिङ स्कुलको ग १ क १३८२ नम्बरको बस चालक ३७ वर्षीय गौतम गुरुङ्ग , बिन्देश्वरी बोर्डिङ स्कुलको ग १ क ६२२१ नम्बरको बस चालक ४४ वर्षीय भक्त बहादुर गुरुङ्ग , अञ्जली बोर्डिङ स्कुलको ग १ क ६४०३ नम्बरको बस चालक ४८ वर्षीय डम्बर बहादुर गुरुङ्ग र एस.ओ.एस बोर्डिङ स्कुलको ग १ क ६४३३ नम्बरको बस चालक ४७ वर्षीय पदम बि.क रहेका छन ।
विभिन्न विद्यालयमा आफ्ना छोरा छोरीहरुलाई अध्ययन गर्न पठाउने स्थानीय अभिभावकहरुले पटकपटक गुनासो गर्दै आएको र विद्यालय जस्तो संवेदनशील ठाउँ साथै बालबालिका बोकेर हिड्ने बस चालकहरु मा.प.से. गरि बस चलाउछन भन्ने सूचना पाएपछि कास्की जिल्ला प्रहरीले मातहत समेतको ट्राफिक प्रहरी टोलिलाई खटाइ निरिक्षण गरेको थियो ।
