रुकुम पश्चिम । रुकुम पश्चिमको आठविसकोट नगरपालिका–स्तरीय अन्तरमाध्यमिक विद्यालय स्तरीय राष्ट्रपति रनिङ शिल्ड–२०८२ सम्पन्न भएको छ। प्रतियोगितामा विभिन्न विद्यालयले स्वर्ण, रजत र कास्य पदक जित्दै प्रतिस्पर्धा गरेका छन्।
नगरपालिकाले सार्वजनिक गरेको नतिजाअनुसार श्री बालकल्याण माध्यमिक विद्यालय राडीले १६ स्वर्ण, ५ रजत र ३ कास्य गरी कुल २४ पदकसहित प्रथम स्थान हासिल गरेको छ। त्यसैगरी श्री कालिका माध्यमिक विद्यालय सन्दुसापानीले ११ स्वर्ण, ३ रजत र ५ कास्यसहित १९ पदक प्राप्त गर्दै द्वितीय स्थानमा रहन सफल भएको छ।
यस्तै, श्री सहिद स्मृति नमुना माध्यमिक विद्यालय राडीले १० स्वर्ण, ७ रजत र १३ कास्य गरी कुल ३० पदक जिते पनि पदक तालिकाको आधारमा तृतीय स्थानमा सीमित भएको छ।
प्रतियोगितामा नगरभित्रका १८ वटा माध्यमिक विद्यालयको सहभागिता रहेको थियो। खेलकुद प्रतियोगितामार्फत विद्यार्थीमा अनुशासन, सहकार्य र प्रतिस्पर्धी भावना विकास हुने विश्वास लिइएको छ।आठविसकोट नगरपालिकाको शिक्षा, युवा तथा खेलकुद शाखाले आगामी वर्षहरूमा राष्ट्रपति रनिङ शिल्डलाई अझ व्यवस्थित र प्रतिस्पर्धी बनाउने प्रतिबद्धता जनाएको छ।
