पोखरा : मदरल्याण्ड चेस क्लबको आयोजनामा पोखरास्थित मदरल्याण्ड सेकेन्डरी स्कुलमा ३ दिने विन्टर चेस क्याम्प सम्पन्न भएको छ । क्याम्पले विद्यार्थीहरूमा चेसप्रति असाधारण उत्साह र नयाँ ऊर्जा सिर्जना गरेको आयोजकले बताएका छन भने बिहान १०:०० बजेदेखि दिउँसो ३:३० बजेसम्म क्याम्प चलेको थियो।
क्याम्पमा सहभागी विद्यार्थीहरूले राष्ट्रिय र अन्तर्राष्ट्रिय स्तरका अनुभवी प्रशिक्षकहरूबाट प्रत्यक्ष प्रशिक्षण पाएका थिए। प्रशिक्षण टोलीमा एसिया ओपन प्रतियोगिताको पाँचौं स्थान प्राप्त खेलाडी, लाइसेन्स प्राप्त राष्ट्रिय निर्णायक, अन्तर्राष्ट्रिय U–20 वर्गमा तीन पटक स्वर्ण पदक विजेता खेलाडी, नेपालका नम्बर १ चेस स्ट्रिमर, र चेसका विभिन्न सीपमा दक्ष अन्य प्रशिक्षकहरू सहभागी थिए।
क्याम्पको विशेष आकर्षण डेमो चेस बोर्ड, ठूलो डिजिटल टिभी, र डिजिटल बोर्डको प्रयोग गरी अभ्यास गरिनु थियो, जसले विद्यार्थीहरूले चालहरूको प्रत्यक्ष प्रदर्शन, खेल विश्लेषण र रणनीति बुझ्न सजिलो र रमाइलो बनाएको थियो ।
तीन दिनको क्याम्पमा सहभागीहरूले ओपनिङदेखि एन्डगेमसम्मका रणनीति, ट्याक्टिकल अभ्यास, मैत्रीपूर्ण खेलहरू, र खेल विश्लेषण सिकेका थिए। यसले विद्यार्थीहरूमा तार्किक सोच, धैर्य, अनुशासन, र प्रतिस्पर्धात्मक भावना विकास गर्न ठूलो योगदान गरेको आयोजकले बताएको छ।
कार्यक्रम समापन समारोहमा क्लबका अध्यक्ष परिबेश थापाले आगामी दिनहरूमा प्रशिक्षण क्याम्पसँगै विभिन्न स्तरका प्रतियोगिता र च्याम्पियनसिपहरू आयोजना गर्ने योजना रहेको जानकारी दिएका छन भने उनले यसबाट पोखरामा चेस खेलको स्तर उकास्ने र नयाँ प्रतिभाहरू उत्पन्न हुने विश्वास व्यक्त गरेका छन ।
कार्यक्रम सफल बनाउन सहयोग पुर्याउने मदरल्याण्ड सेकेन्डरी स्कुल, शिक्षक वर्ग, अभिभावक र सहभागी विद्यार्थीहरूलाई आयोजकले धन्यवाद दिएको छ।
