रुकुम पश्चिम। यहाँको आठबिसकोट नगरपालिका १२ स्थित कालाखोला लघु जलविद्युत् आयोजना १५ वर्षदेखि अलपत्र छ । २०६६ सालमा तत्कालिन नेकपा माओवादी केन्द्रका कर्णाली प्रदेशसभा सदस्य रातो कामी निर्माण उपभोक्ता समितिका अध्यक्ष भएको यो आयोजना १५ वर्ष देखि अलपत्र छ । बिजुलीको घरमा झाडी उम्रीएको छ। भने बिजुलीका पोल र तार लथालिंग अवस्थामा छन्। ६५ किलोवाट विद्युत् उत्पादन क्षमता रहेको उक्त आयोजनाबाट १ हजार १ सय उपभोक्ता लाभान्वित हुने अपेक्षा छ ।
०६६ सालमा पुर्व संसद कामीको अध्यक्षतामा समिति गठन गरेर कार्यालय समेत स्थापना भएको थियो। २०६७ सालदेखि विद्युत् आयोजना निर्माण थालिएको थियो । आठबीसकोट नगरपालिकाले २७ लाख तथा साविक गाविस र संसद विकास कोषबाट ४८ लाख बजेट उक्त आयोजनामा खर्च भइसकेको छ ।
योजनाका लागि तत्कालिन गाविसले ३८ लाख र जिल्ला विकास समितिमार्फत संसद् विकास कोषको १० लाख रुपैयाँ खर्च भएको छ भने । यो आयोजनामा झन्डै १ करोड हाराहारीमा बजेट खर्च भइसकेको छ। तर योजना निर्माण त के यसको कति प्रतिशत काम भयो भन्ने समेत पत्तो छैन ।
पहुँचका आधारमा दिएको योजना अहिले वेवारिसे अवस्थामा पुगेको छ। आयोजना समितिका अध्यक्ष बनेका कामी संसद हुँदै उर्जा मन्त्री समेत बने तर आफैले नेतृत्त्व गरेको बिजुली बाल्न सकेनन।
उक्त आयोजनामा आवश्यक पर्ने सामग्री खरिद समेत उधारो रहेको र काम गर्ने कामदारले पनि हाल सम्म ज्याला नपाएको गुनासो गर्दै आएका छन्। घर समेत बनेको यो आयोजना अलपत्र हुँदा अहिले पनि यहाँका स्थानीय अध्यारोमा बस्न बाध्य भएका छन्।
निर्माण सामग्री खरिद गरिएको मध्ये अधिकांशले समितिले उधारो नतिरेको गुनासो गर्दै आएका छन् । आयोजना निर्माणमा काम गरेका अधिकांश मजदुुरले पारिश्रमिक नपाएको गुनासोसमेत गरेका छन् । वैकल्पिक ऊर्जाको आर्थिक सहयोगमा निर्माण हुने भनिएको उक्त आयोजना एचए हाइड्रो कम्पनीसँग सम्झौता समेत हुन् नसकेको बुझिएको छ।
