रुकुम पश्चिमको चौरजहारी स्थित सहिद स्मृति नगर अस्पतालमा एकजना बिरामीको मृत्यु भएपछी मृतक बिरामीका आफन्तहरुले अस्पतालको लापरवाहीका कारण मृत्यु भएको दाबी गरेका छन्। जिल्लाको चौरजहारी नगरपालिका १३ का ४६ वर्षीय गंगाधर जैसीको उपचारका क्रममा मंगलबार मृत्यु थियो ।

अहिले मृतकका आफन्तले चौरजहारी नगरपालिकाको कार्यालयमा पुगेर नगर प्रमुख पुष्प बादी बिरुद्ध नाराबाजी गरिरहेका छन्। मृतकका आफन्तले नगर प्रमुख बादीलाई अंकित गर्दै पुष्प बादी मुर्दावाद भन्दै नाराबाजी गरेका छन्।

सामान्य टाउको दुखेपछी नगर अस्पतालमा उपचार गराउन आएका जैसीको ल्याव रिपोर्ट समयमै नआएको भन्दै अस्पतालको ढिला सुस्तीका कारण उनको ज्यान गएको बताईएको छ । पारिवारिक स्रोत अनुसार जैसीले समयमै उपचार नपाउँदा ज्यान गुमाउनु परेको भन्दै नगर अस्पतालको लापरवाही माथि अनुसन्धान गर्नुपर्ने माग गरिएको छ ।

चौरजहारी नगरपालिका १० स्थित सहिद स्मृति नगर अस्पतालमा भएको लापरवाही चौरजहारी नगरपालिका र अस्पताल प्रशासन समक्ष घटनाको छानबिन, दोषिलाई कारबाहि र क्षतिपूर्तिको माग राखेका छन् । मृतकको शव पोष्टमार्टमको लागि जिल्ला अस्पताल सल्ले पठाइएको छ । तर आफन्तले दोषी माथि कारबाही नभएसम्म शव नबुझ्ने बताएका छन्।

यता अस्पतालले जैसीलाई अत्यधिक ज्वरो आएको र उनको रिपोर्टमा डेंगी देखिएको बताएको छ । सहिद स्मृती नगर अस्पतालका प्रमुख चुडामणी केसी भन्छन, अस्पतालको कुनै दोष छैन्। बिरामी अस्पताल भर्ना भएदेखि नै स्वास्थ्यकर्मीहरुले उपचार गरिरहेको र सोही अनुसार औषधी प्रयोग गरिएको छ । उच्च ज्वरो र डेंगीका कारण उनको मृत्यु भएको अस्पतालको भनाइ छ ।