हैदराबाद । दक्षिण भारतीय सिनेमा जगतका चर्चित अभिनेता कोटा श्रीनिवास रावको ८३ वर्षको उमेरमा आइतबार निधन भएको छ। लामो समयदेखि अस्वस्थ रहेका उनले हैदराबादको जुबली हिलस्थित आफ्नै निवासमा बिहान अन्तिम सास फेरे। केही दिनअघि मात्र उनले आफ्नो ८३औं जन्मदिन मनाएका थिए।
कोटा श्रीनिवासले तेलुगु, तमिल, कन्नड र हिन्दी भाषामा ७५० भन्दा बढी फिल्महरूमा अभिनय गरेका थिए। खलनायकका रूपमा विशेष छवि बनाएका उनले सन अफ सत्यमूर्ति, टेम्पर, येवादु, सरकार, बागी, रक्त चरित्र जस्ता फिल्ममार्फत दर्शकको मन जितेका थिए।
उनी सन् २०१५ मा भारत सरकारद्वारा पद्मश्री सम्मानबाट विभूषित भएका थिए। अभिनयसँगै उनी राजनीतिमा पनि सक्रिय थिए। सन् १९९९ देखि २००४ सम्म उनी आन्ध्र प्रदेशको विजयवाडा पूर्व क्षेत्रबाट विधायक थिए।
उनको निधनप्रति शोक व्यक्त गर्दै तेलंगानाका मुख्यमन्त्री रेवन्त रेड्डीले भने, “कोटा गरुको अनुपस्थितिले फिल्म उद्योग अपूरणीय क्षतिमा परेको छ।” आन्ध्र प्रदेशका मुख्यमन्त्री एन. चन्द्रबाबु नायडूले पनि उनलाई श्रद्धाञ्जली अर्पण गर्दै, “उनको अभिनयले सधैं दर्शकको हृदयमा स्थान पाएको छ,” भनेका छन्।
कोटा श्रीनिवासलाई अन्तिमपटक २०२३ मा रिलिज भएको फिल्म कब्जा मा देख्न सकिएको थियो। उनको निधनले भारतीय सिनेमा एक प्रतिभाशाली अभिनेता गुमाएको छ। उनको स्मृति सदैव दर्शकको मनमा रहनेछ।
