पाकिस्तानको बहावलपुरमा भारतीय सेनाले गरेको मिसाइल आक्रमणमा आतंकवादी संगठन जैश ए मोहम्मदका प्रमुख कमाण्डर रउफ अजहर मारिएका छन्।
शीर्ष गुप्तचर र भारतीय सेना स्रोतलाई उद्धृत गर्दै यो जानकारी आएको नवभारत टाइम्सले लेखेको छ ।
रउफ असगर जैश–ए– मोहम्मदका संस्थापक मौलाना मसूद अजहरका भाइ थिए। बहावलपुरमा समूहको मुख्यालयलाई लक्षित गरी भएको आक्रमणमा मारिएका अजहरको परिवारका १० सदस्यमध्ये उनी पनि एक थिए। यस हमलामा अजहरका नजिकका ४ जनासहित कुल १४ जनाको मृत्यु भएको थियो ।
कान्दाहार अपहरणको नामले चिनिने भारतीय विमान अपहरणको षड्यन्त्र रउफले नै गरेका थिए । डिसेम्बर १९९९ मा नेपालवाट इन्डियन एयरलाइन्सको उडान सी–८१४ आतंककारीहरूले अपहरण गरेका थिए, जसलाई पछि अफगानिस्तानको कान्दाहारमा लगिएको थियो । भारत सरकारले विमानमा सवार सर्वसाधारणको बदलामा ५ जना डरलाग्दो आतंककारीलाई रिहा गर्नुपरेको थियो, जसमा मसूद अजहर पनि यसमा संलग्न थिए।
रउफ असगर भारतीय विमान अपहरण गर्नुका साथै पठानकोट आतंकवादी हमला र भारतीय संसदमा आक्रमणको पनि जिम्मेवार थिए। रउफ असगरको बुधबार बहावलपुरमा अन्त्येष्टि गरिएको छ । उनको अन्त्येष्टिमा पाकिस्तानी सेना र गुप्तचर एजेन्सी आईएसआईका वरिष्ठ अधिकारीहरू उपस्थित थिए।
रउफ असगरले भारतमा खेलेको रक्तपातपूर्ण खेलका कारण ‘मोस्ट वान्टेड’ आतंककारी थिए । उनले २००७ मा जैश ए मोहम्मदको अपरेशनल प्रमुखको रूपमा पदभार ग्रहण गरेका थिए र भारत विरुद्ध क्रूर अपरेशनको योजना बनाएका थिए । रिपोर्टका अनुसार असगरले २४ वर्षको उमेरमा इन्डियन एयरलाइन्स अपहरण गर्ने षड्यन्त्र रचेका थिए ।
गत बुधबार राति भारतीय सेनाले गरेको ‘अपरेशन सिन्दूर’ को नाममा पाकिस्तान र प्रशासित कश्मीर (पीओके) मा ठूलो सैन्य कारबाही गरेको थियो। भारतले जैश–ए–मोहम्मद र लश्कर–ए–तैयबाका ९ आतंकवादी अड्डालाई मिसाइलले निशाना बनाएको थियो । यसमा जैश ए मोहम्मदको बहावलपुर मुख्यालय पनि सामेल थियो। भारतीय सीमाबाट १०० किलोमिटर टाढा रहेको यस ठाउँमा भएको आक्रमणमा जैश प्रमुख मसूद अजहरका भाइ रउफ असगर र उनको परिवारका १० सदस्यसहित १४ जनाको मृत्यु भएको थियो।
