दाङको घोराहीमा ४५औं विश्व पर्यटन दिवस २०८१ मनाइँने भएको छ । “पर्यटन, न्याय र शान्ति” भन्ने मूल नाराका साथ लुम्बिनी प्रदेश सरकार उद्योग, पर्यटन तथा यातायात मन्त्रालय पर्यटन विकास परिषद् र घोराही उपमहानगरपालिकाको संयुक्त आयोजनमा लुम्बिनी प्रदेशस्तरको विश्व पर्यटन दिवस मनाउन लागेकाे हाे । प्रचारप्रसार उपसमितिले बुधबार घोराहीमा पत्रकार सम्मेलन गरी जानकारी दिए अनुसार घोराहीको सहिद मञ्चमा असाेज ११ गते मनाइँने भएको छ ।
कार्यक्रममा मुख्य आकर्षणको रुपमा लुम्बिनी प्रदेशका बिभिन्न पहिचान झल्किने लोक साँस्कृति झाँकी तथा नृत्यहरु प्रस्तुत रहुनका साथै विभिन्न जातजातिका परम्परागत रैथाने खाना र हस्तकलाको प्रदर्शन गरिने छ । कार्यक्रममा थारु परिकार, मगर परिकार, नेवार परिकार, अवधी परिकार र मुस्लिम परिकार पर्दशन गरिने जनाएकाे छ ।
यसैगरी आकर्षणका रुपमा १० प्रकारका जातीय लोक नृत्य तथा संगितहरु प्रस्तुती गर्ने कार्यक्रमको तय भएको छ। जसमा गन्र्धव समुदायको सारंगी धुन, थारु जातीको बड्का नाच, नुवागाउँले सोरठी नाच, नेवार समुदायको लाखे नाच, अवधि समुदायको अवधि नाच, देउखुरीको थारु जातिको कठघोरी नाच, चारुको सख्या नाच, पाल्पाको कौरा नाच, मगरको भूम्या नाच र सरंगे (मयुर) नाच प्रस्तुत हुनेछन् ।
कार्यक्रममा उत्कृष्ट झाँकी र नृत्यहरु प्रस्तुत गर्नेलाई पुरस्कृत गरिने भएको छ भने कार्यक्रममा निशुल्क स्टलको व्यवस्था गरिएको समेत समितिले जनाएको छ । दिवसको अवसरमा बाहिरी जिल्लाहरुबाट आएका अतिथि र कलाकारहरुलाई यस क्षेत्रको पर्यटन प्रवर्द्धनका लागि घोराहीमा रहेका बाह्रकुने दह, ज्यामिरे दह, लखनपार्क, अम्बिकेश्वरी मन्दिर, गोरक्षपात्रदेवता सिद्धरत्ननाथ मठ, चेपे दह, रामपुरको हनुमान मन्दिर र पाण्डवेश्वर महादेव धामको भ्रमण गराउने कार्यक्रम रहेको प्रचारप्रसार उपसमितिका संयोजक दुर्गालाल केसीले जानकारी दिए ।
कार्यक्रम लुम्बिनी प्रदेशका मुख्यमन्त्री चेतनारायण आचार्यको प्रमुख आतिथ्यतामा उद्घाटन हुने भने प्रदेश सरकारका उद्योग, पर्यटन तथा यातायात मन्त्री प्रचण्डविक्रम न्यौपानेको अध्यक्षता कार्यक्रम हुने आयोजकले जानकारी दिएकाे छ।
मुल समारोह समितिकी सहसंयोजक हुमाकुमारी डिसीको अध्यक्षतमा भएको कार्यक्रमको सहजीकरण प्रचारप्रसार उपसमितिका संयोजक दुर्गालाल केसीले गरेका थिए ।
