रुकुम पश्चिम । चौरजहारी नगरपालिका–११ नेप्टेकाँडामा आयोजित १२ भदौको मेलाबाट बचत भएको रकम स्ट्रोकका कारण गम्भीर बिरामी परेका स्थानीय दलजित ओलीको उपचारमा सहयोग स्वरूप हस्तान्तरण गरिएको छ।
देश तथा विदेशमा रहेका चौरजहारी नगरपालिका–११ नेप्टेकाँडाका युवाहरूको सहयोगमा मेलाका लागि संकलन भएको रकम मध्ये खर्च कटाएर बाँकी रहेको १० हजार ५ सय २० रुपैया बिरामी ओलीको परिवारलाई हस्तान्तरण गरिएको हो।
सहयोग रकम बिरामी दलजित ओलीकी श्रीमती रवि ओलीलाई उहाँकै घरमा पुगेर हस्तान्तरण गरिएको बताइएको छ। ओली केही समयदेखि स्ट्रोकका कारण बिरामी भई उपचाररत रहेको परिवारले जनाएको छ।
चौरजहारी नगरपालिका–११, पिपलबोट खेलमैदान नेप्टेकाँडामा १२ भदौमा मेला आयोजना गरिएको थियो। मेलाबाट बचत भएको रकम लाई मनोरञ्जन तथा अन्य प्रयोजनमा खर्च नगरी गाउँकै गम्भीर बिरामीलाई सहयोग गर्ने उद्देश्यले हस्तान्तरण गरिएको मेला आयोजकले जनाएको छ।
यस सहयोग अभियानको मुख्य पहल भीमबहादुर डाँगी र देपेन्द्र ओलीले गरेका थिए। उनीहरूको पहलमा देश तथा विदेशमा रहेका नेप्टेकाँडाका युवाहरूबाट प्राप्त सहयोग र मेलाबाट बचत भएको रकम बिरामी परिवारलाई प्रदान गरिएको हो।
आयोजकहरूले सामाजिक उत्तरदायित्व अन्तर्गत गाउँमा अप्ठ्यारो अवस्थामा रहेका व्यक्तिलाई सहयोग गर्ने उद्देश्यले अभियान सञ्चालन गरिएको बताएका छन्। बिरामी दलजित ओलीको उपचारमा सहयोग पुग्ने विश्वाससहित देश तथा विदेशमा रहेका सम्पूर्ण सहयोगी युवाहरूप्रति आयोजकहरूले आभार व्यक्त गरेका छन्।
