भक्तपुर । भोटेकोशी नदीमा आएको आकस्मिक बाढीबाट प्रभावित नागरिकको राहत, उद्धार तथा पुनःस्थापनाका लागि चाँगुनारायण नगरपालिकाले ५० लाख ३५ हजार रुपैयाँ आर्थिक सहयोग गर्ने निर्णय गरेको छ ।
नगरपालिकाले जारी गरेको विज्ञप्तिअनुसार बाढीबाट रसुवा, नुवाकोटलगायतका जिल्लामा भएको जनधनको क्षतिप्रति दुःख व्यक्त गर्दै विपद्बाट प्रभावित नागरिकलाई राहत, उद्धार तथा पुनःस्थापनामा सहयोग पुर्याउने उद्देश्यले आर्थिक सहयोग उपलब्ध गराउने निर्णय गरिएको हो ।
नगरपालिकाका अनुसार स्थानीय विपद् व्यवस्थापन समितिको निर्णयअनुसार विपद् व्यवस्थापन कोषबाट १० लाख रुपैयाँ उपलब्ध गराइनेछ। यस्तै चाँगुनारायण नगरपालिकाका जनप्रतिनिधिहरूले एक महिनाको सेवा सुविधाबापतको रकम सहयोग गर्ने निर्णय गरेका छन ।
नगरपालिकामा कार्यरत कर्मचारीबाट पनि तहअनुसारको तलब बराबरको रकम सहयोग गरिने भएको छ ।
अधिकृतस्तरदेखि छैटौँ तहसम्मका कर्मचारीबाट सात दिन बराबरको तलब, सहायकस्तरका कर्मचारीबाट पाँच दिन बराबरको तलब तथा श्रेणीविहीन कर्मचारीबाट दुई दिन बराबरको तलब सहयोग गरिने विज्ञप्तिमा उल्लेख छ।
त्यसैगरी चाँगुनारायण नगरपालिकामा कार्यरत शिक्षकहरूबाट समेत आर्थिक सहयोग संकलन गरिने भएको छ।
शिक्षकहरूबाट करिब १३ लाख रुपैयाँ सहयोग जुट्ने नगरपालिकाले जनाएको छ। सबै शीर्षकको रकम जोड्दा कुल ५० लाख ३५ हजार रुपैयाँ बराबरको सहयोग हुने जनाइएको छ ।
नगरपालिकाले विपद्को यस दुःखद् घडीमा बाढी प्रभावित नागरिकप्रति ऐक्यबद्धता, मानवीय संवेदना र सामाजिक उत्तरदायित्व प्रदर्शन गर्दै सहयोग गर्ने निर्णय गरिएको जनाएको छ।
नगर प्रमुख जीवन खत्रीद्वारा जारी विज्ञप्तिमा विपद्का कारण प्रभावित परिवारको राहत, उद्धार तथा पुनःस्थापनाका लागि आवश्यक सहयोग र समन्वयमा नगरपालिका निरन्तर सक्रिय रहने प्रतिबद्धता व्यक्त गरिएको छ। साथै विपद्बाट प्रभावित सम्पूर्ण नागरिकको शीघ्र उद्धार, राहत तथा पुनःस्थापनाका लागि सम्बन्धित सबैलाई समन्वय र सहकार्य गर्न आग्रह गरिएको छ ।
