जाजरकोटको नलगाड नगरपालिका– ७ दानेपिपलस्थित डोल्पा–जाजरकोट सडकखण्डमा जिप दुर्घटना हुँदा एकजनाको मृत्यु भएको छ भने ६ जना घाइते भएका छन्।

Advertisement

जिल्ला प्रहरी कार्यालय जाजरकोटका प्रहरी प्रमुख बुद्धिसागर पुरीका अनुसार हिजो बेलुका भएको दुर्घटनामा नलगाड नगरपालिका– १० निवासी बालकृष्ण बोहराको मृत्यु भएको हो।

दुर्घटनामा घाइतेमध्ये दुईजनालाई थप उपचारका लागि रुकुम पश्चिमको पिपलचौर रेफर गरिएको थियो। तर, पिपलचौर क्षेत्रमा पहिरोका कारण सडक अवरुद्ध भएपछि रेफर गरिएका दुवैजनालाई पुनः नगर अस्पताल नलगाडमै फिर्ता ल्याइएको प्रहरी प्रमुख पुरीले जानकारी दिए।

दुर्घटनामा घाइते अन्य चारजनाको उपचार नगर अस्पताल नलगाडमा भइरहेको छ। दुर्घटनाको कारणबारे थप अनुसन्धान भइरहेको जिल्ला प्रहरी कार्यालय जाजरकोटले जनाएको छ।