नेपालको नयाँ राजनीतिक शक्ति रूपमा उदाएको राष्ट्रिय स्वतन्त्र पार्टी (रास्वपा) का केही सांसदहरू सपथ ग्रहण गरेको छोटो समयमै विभिन्न गतिविधि र अभिव्यक्तिका कारण सामाजिक सञ्जालमा चर्चामा आएका छन्। यी घटनाले सार्वजनिक पदमा रहेका व्यक्तिहरूको व्यवहार र जिम्मेवारीबारे बहस समेत सुरु गराएको छ।
धादिङ बाट निर्वाचित सांसद आशिका तामाङ संविधान च्यापेर हिन्दी गीतमा नाचेको भिडियो सार्वजनिक भएपछि चर्चामा आएकी थिइन्। उक्त भिडियोबारे प्रश्न उठेपछि उनले त्यसलाई “एआईबाट बनाइएको” दाबी गरेकी थिइन्,। जसले झन् बहस बढाएको थियो।
त्यस्तै, सांसद खगेन्द्र सुनारले सिन्धुली घटनासम्बन्धी अभिव्यक्ति दिँदै प्रहरीलाई “घिसार्छु” भनेको भिडियो सार्वजनिक भएपछि चौतर्फी आलोचना भएको थियो। उनको उक्त अभिव्यक्तिलाई लिएर सामाजिक सञ्जालमा कडा प्रतिक्रिया देखिएको थियो।
ओखलढुंगा बाट निर्वाचित अर्का रास्वपाका सांसद विश्वराज पोखरेल पनि एक विद्यालय कार्यक्रममा दिएको अभिव्यक्तिका कारण चर्चामा आए। उनले आफू “जिल्लाको मान्यज्यु” भएको भन्दै स्वागत र सम्मान हुनुपर्ने बताएका थिए, जसलाई लिएर आलोचना र समर्थन दुवै प्रतिक्रिया आएका थिए।
यसैबीच, सांसद कबिन्द्र बुर्लाकोटी एक कार्यक्रममा सहभागी हुँदा अरू व्यक्तिले छाता ओढाइदिएको दृश्य सामाजिक सञ्जालमा भाइरल बनेको थियो। उक्त घटनालाई लिएर सार्वजनिक पदमा सादगी र व्यवहारबारे टिप्पणीहरू आएका छन्।
यी घटनाहरूले नयाँ राजनीतिक दलका जनप्रतिनिधिहरूबाट जनताले राखेको अपेक्षा, सार्वजनिक आचरण, र सामाजिक सञ्जालको प्रभावबारे पुनः बहस सिर्जना गरेको छ। विश्लेषकहरूका अनुसार सार्वजनिक पदमा रहेका व्यक्तिहरूले अभिव्यक्ति र व्यवहारमा अझ सजग हुनुपर्ने आवश्यकता देखिएको छ।
