रुकुम पश्चिम । शिक्षा प्राप्त गर्ने चाहनालाई उमेरले कहिल्यै रोक्न सक्दैन भन्ने उदाहरण बनेकी छन् जानकी उपाध्याय ६० वर्षको उमेरमा उनले कक्षा ८ को परीक्षा दिँदै समाजलाई प्रेरणादायी सन्देश दिएकी छन्।
रुकुम पश्चिमको आठबिसकोट ९ निवासी उपाध्याय सोही वडाकी वडा सदस्य समेत रहेकी जानकीले बाल्यकालमा विभिन्न पारिवारिक र सामाजिक कारणले पढाइ पूरा गर्न पाइनन्। तर, मनभित्रको पढ्ने चाहना कहिल्यै मरेन। अहिले आएर उनले त्यो अधुरो सपना पूरा गर्ने अठोट लिएकी हुन्।
उनी भन्छिन्, “पढ्नका लागि उमेरले छेक्दैन। इच्छा र लगन भए जुनसुकै समयमा पनि सिक्न सकिन्छ।” परीक्षा केन्द्रमा उनी अन्य विद्यार्थीहरूसँगै बसेर आत्मविश्वासका साथ परीक्षा दिइरहेकी देखिन्छिन्।
स्थानीयवासी र विद्यार्थीहरूका लागि जानकी प्रेरणाको स्रोत बनेकी छन्। उनको यो प्रयासले विशेषगरी महिलाहरू र ज्येष्ठ नागरिकहरूलाई शिक्षाप्रति पुनः आकर्षित गराउने विश्वास गरिएको छ। गत स्थानीय तहको निर्वाचनमा आठबिसकोट नगरपालिका-९ बाट निर्वाचन वडा सदस्य जानकीले सहिद स्मृति नमुना माविको परीक्षा केन्द्र बाट कक्षा ८ को वार्षिक परीक्षा दिदै छन।
शिक्षा क्षेत्रका सरोकारवालाहरूले पनि उनको साहसिक कदमको प्रशंसा गर्दै जीवनभर सिक्ने संस्कारलाई प्रवर्द्धन गर्नुपर्ने बताएका छन्।
