पोखरा । मदरल्याण्ड चेस क्लबको आयोजनामा सम्पन्न गण्डकी प्रदेश स्तरीय विद्यार्थी चेस फेस्ट सम्पन्न भएको छ । एक कार्यक्रमका बीच पुरस्कार वितरण समारोहसहित सफलतापूर्वक सम्पन्न गरिएको हो ।

“1st Province Level Team Chess Championship – २०८२” मा कप्तान परिवेश थापाको नेतृत्व रहेको पोखरा वडा नं. १७ ले सबै खेलमा च्याम्पियन उपाधि हासिल गरेको छ। उत्कृष्ट समन्वय, रणनीति र स्थिर प्रदर्शनका कारण उक्त टिम कुनै पनि खेलमा अपराजित रहँदै शीर्ष स्थानमा पुग्न सफल भएको थियो ।

मदरल्याण्ड चेस क्लब (कप्तान – श्री प्रबेग अधिकारी) उपविजेता बनेको छ भने ग्लोबल चेस क्लब (कप्तान – आयुष भण्डारी) द्वितीय उपविजेतामा सीमित भएको छ। छोरेपाटन मा.वि. (कप्तान – सुश्री दीपिका लमिछाने) तृतीय उपविजेता तथा मदरल्याण्ड सेकेन्डरी स्कूल (कप्तान – नियन पौडेल) चौथो उपविजेता बनेका छन्।

व्यक्तिगत प्रदर्शनतर्फ बोर्ड नं. १ मा सुजन रानाभाट, बोर्ड नं. २ मा संकल्प पौडेल, बोर्ड नं. ३ मा आलिश्मा पनेरु र बोर्ड नं. ४ मा देव अग्रहरी उत्कृष्ट घोषित भएका छन्।

चेस क्विज प्रतियोगितामा हिमालयन बोर्डिङ स्कूल प्रथम, अमरसिंह सेकेन्डरी स्कूल द्वितीय, ग्लोबल चेस क्लब तृतीय र मदरल्याण्ड चेस क्लब चौथो स्थानमा रहेको छ। साथै, चेस अक्सन प्रतियोगितामा पर्डी मा.वि. विजेता बनेको छ।

प्रतियोगिताभर उच्चस्तरीय प्रतिस्पर्धा, अनुशासन र खेल भावना देखिएको आयोजकले जनाएको छ। कार्यक्रमले गण्डकी प्रदेशमा विद्यार्थीस्तरमा चेस खेलको विकास र नयाँ प्रतिभाको पहिचानमा महत्वपूर्ण योगदान पुर्‍याउने विश्वास व्यक्त गरिएको छ।