आठविसकोट । मानो रोपेर मुरी उब्जाउने दिनका रूपमा मनाइँदै आएको १५ असार अर्थात् आइतबार परेको २२ औँ राष्ट्रिय धान दिवस तथा रोपाइँ महोत्सव रुकुम पश्चिमको आठविसकोट नगरपालिकामा धान रोपाइँ गरेर मनाइएको छ । मानो रोपेर मुरी फलाउने दिन “धानवालीमा सघनता, खाद्यबाली र आत्मनिर्भरता” भन्ने मुल नाराका साथ २२ औं राष्ट्रिय धान दिवस आठविसकोटमा पनि मनाइएको हो ।
वडा नम्बर ९ राडी बजारमा कृषकका खेतमा धान रोपाइँ सहित धान दिवस मनाईएको छ । किसान वर्षभरका लागि छाक जुटाउन यो महीना खेतीमा व्यस्त हुन्छन् । 
असारमा एकपटक हिलोमा पस्नै पर्ने वा हिलो टेक्ने मान्यता पनि नेपाली समाजमा प्रचलन रहेको छ ।
आठविसकोट नगरपालिकाका नगर प्रमुख, उपप्रमुख , प्रमुख प्रशासकीय अधिकृत, वडाका जनप्रतिनिधि र स्थानीय कृषकहरूको सहभागितामा धान रोपेर उल्लासमय रुपमा धान दिवस मनाइएको हो ।
रोपाइँ कार्यक्रममा नगर प्रमुख रबि केसी, उपप्रमुख धनकुमारी शाही, निमित्त प्रमुख प्रशासकीय अधिकृत राजेश गौतम, १ नम्बर वडा अध्यक्ष देव बहादुर घर्ति, २ नम्बर अध्यक्ष देव बहादुर यरी, ३ नम्बर अध्यक्ष केशरमान बिक, विधिन्न संघ- संस्थाका प्रमुख तथा प्रतिनिधि, पत्रकार लगाएतको सहभागिता रहेको थियो ।
धानको विविध महत्वलाई दृष्टिगत गरी यसको उत्पादन वृद्धि एवं आधुनिकीकारण र व्यवसायिकरण प्रबर्द्धन गर्ने उद्देश्यले २०६१ सालदेखि नियमित रूपमा प्रत्येक वर्ष असार १५ मा राष्ट्रिय धान दिवस तथा रोपाइँ महोत्सव मनाउँदै आईएको छ ।
